— श्रीमतीलाई आत्महत्या गर्न बाध्य पारेको आरोपमा एक जनालाई प्रहरीले पक्राउ गरेको छ । पक्राउ पर्नेमा थलारा गाउँपालिका –४ का २८ वर्षीय राजेश साउद रहेका छन् ।
शुक्रबार बिहान उनकी श्रीमती २७ वर्षीया धर्मा साउदको शव सेती नदीमा फेला परेको थियो । मृतक धर्माका माइतीको उजुरीको आधारमा राजेशलाई पक्राउ गरिएको र घटनाबारेमा थप अनुसन्धान भइरहेको जिल्ला प्रहरी कार्यालयका निमित्त प्रमुख प्रहरी निरीक्षक लोकेन्द्र ठगुन्नाले जानकारी दिएका छन् ।
शुक्रबार राति तीन बजे श्रीमती घरबाट निस्किएको र करिब दुई घण्टा तल रहेको सेती नदीको पुलबाट हाम फालेको श्रीमान् राजेश साउदले बयान दिएको ठगुन्नाले बताए । ‘धर्मालाई आफूलगायत केही मान्छेले पछ्याउँदै गएको र श्रीमतीले हेर्दाहेर्दै हाम फालेको बयान दिएका छन्,' ठगुन्नाले भने, ‘अभियुक्तको बयान, घटनाको समय आदी कारणले घटना शंकास्पद देखिन्छ । पोस्टमार्टम रिपोर्ट आएपछि हत्या वा आत्महत्या के हो भन्ने थप खुल्नेछ ।'
यसअघि पनि पटक पटक कुटपिट गर्ने र यातना दिने गरेको आधारमा अहिले आत्महत्या दुरुत्साहनको मुद्दामा उनीमाथि अनुसन्धान भइरहेको ठगुन्नाले जानकारी दिए ।
सेती नदीमा हाम फालेको भनिए पनि मृतकको पेट नफुलेको, टाउकोलगायत विभिन्न ठाउँमा चोट लागेको कारण आत्महत्या नभएर हत्या भएको हुन सक्ने माइती पक्षको आशंका छ ।
बिहीबार साँझतिर आफूले छोरीलाई फोन गर्दा ज्वाइँले उठाएको र छोरीलाई कुरा गर्न नदिएकोले साँझ नै हत्या भएको हुन सक्ने मृतककी आमा देवगिरी देवी धामीको आशंका छ ।
‘साँझ सात बजेतिर छोरीलाई फोन गर्दा ज्वाइँले उठाए । छोरीलाई दिनुस् भन्दा बोल्दिन भन्दैछन् भनेर काटे,' उनले भनिन, ‘भोलीपल्ट बिहान त मरिसकी भनेर खबर आउँछ । हाम फालेको भए त पेट सुन्निएको हुनु पर्ने त्यसो पनि छैन । राति नै मारेर फालेका हुन् की भन्ने शंका छ ।'
उनले यसअघि उनका बालकहरूलाई पनि आमाबाट खोसेर भारत लगेको बताउँदै छोरीलाई शारीरिक र मानसिक यातना दिने गरेको बताइन् । उनका नौ र पाँच वर्षका दुई छोरा बाजे बज्यैले भारत लगेर गएको र एक तीन वर्षकी छोरी साथमा रहेको देवीले सुनाइन् ।
