— नेपाल टेलिकमले मंगलबार आफ्नो २१औँ वार्षिकोत्सवका अवसरमा ‘भीओवाइफाई’ सेवाको व्यावसायिक सञ्चालन सुरु गरेको छ । सञ्चार तथा सूचना प्रविधिमन्त्री पृथ्वीसुब्बा गुरुङले यो सेवाको औपचारिक उद्घाटन गरेसँगै सेवा सञ्चालनमा आएको हो ।
भ्वाइस ओभर वाइफाई वा ‘भीओवाईफाई’ मार्फत वाइफाई नेटवर्कबाटै भ्वाइस तथा एसएमएस सेवा प्रयोग गर्न सकिने टेलिकमकी प्रबन्ध निर्देशक संगीत पहाडीले जानकारी दिइन् । उनका अनुसार भोवाईफाई सपोर्ट गर्ने र भोल्टे सेवा सक्रिय भएका जुनसुकै मोबाइल फोनहरूमा यो सेवा उपलब्ध हुनेछ ।
नेपालभित्र रहँदा यो सेवा प्रयोग गर्दा हाललाई साविककै भ्वाइस तथा एसएमएस प्याकेज वा ‘पे एज यु गो’ अनुसार शुल्क लाग्नेछ । विदेशबाट भीओवाइफाई सेवा प्रयोग भने आगमन कल निःशुल्क हुने र बाहिर जाने कलको शुल्क प्रतिमिनेट ३ रुपैयाँ लाग्ने टेलिकमले जनाएको छ ।
मोबाइल नेटवर्क नभएको वा कमजोर रहेका ठाउँमा भीओवाइफाई सेवामा वाइफाईको माध्यमबाट फोन कल गर्न र एसएमएस पठाउन सकिन्छ । मोबाइल कलहरू टुजी, थ्रीजी, फोरजीजस्ता सेलुलर नेटवर्कका माध्यमबाट गरिने भए पनि मोबाइल नेटवर्क कमजोर भएका स्थानहरू सम्पर्कविहीन हुन नपरोस् भनेर भीओवाइफाई सेवा शुरु गरिएको टेलिकमले जनाएको छ ।
'भीओवाइफाई एउटा यस्तो प्रविधि हो जसमार्फत मोबाइल नेटवर्कको कभरेज नभएको ठाउँमा इन्टरनेटको सञ्जालमा आबद्ध कुनै पनि पब्लिक वाइफाई नेटवर्कमा रही मोबाइल नम्बरकै आधारमा भ्वाइस कल र एसएमएस गर्न सकिनेछ,' कार्यक्रममा भनिएको थियो, 'मोबाइल सेवाको पहुँच कमजोर रहेको वा कभरेज नभएको स्थानमा पनि सेवाग्राहीलाई सम्पर्कमा राख्न यो सेवाको विशेष भूमिका रहनेछ ।'
विदेशमा रहेका नेपाल टेलिकमका ग्राहकहरूले पनि यो सेवा प्रयोग गर्न सक्नेछन् । वाइफाई नेटवर्कमा पहुँच भएमा प्रयोगकर्ताले नेपालभित्रै जस्तै फोन कल गर्न र एसएमएस पठाउन सक्नेछन् । टेलिकमले भीओवाइफाई सेवाको सुरुवातसँगै ग्राहकहरूलाई थप सहज र प्रविधिमैत्री सञ्चार सेवा उपलब्ध गराउने लक्ष्य राखेको उल्लेख गरेको छ ।
