— सरकारी स्वामित्वको नेपाल टेलिकमले १८०० मेगाहर्ज ब्याण्डमा सञ्चालन भइरहेको टु जी सेवा बन्द गर्ने घोषणा गरेको छ । कम्पनीले यसै आर्थिक वर्षभित्रमा टु जी सेवा बन्द गर्ने योजना रहेको जानकारी दिएको हो ।
मंगलबार टेलिकमको २१ औँ वार्षिकोत्सवका अवसरका आयोजित कार्यक्रममा कम्पनीकी प्रबन्ध निर्देशक संगीता पहाडीले टु जी सेवा बन्द गर्नेबारे जानकारी दिएकी थिइन् । टेलिकमले प्रविधि रूपान्तरण तथा गुणस्तरीय सेवा प्रदान गर्ने उद्देश्यले फोर जीको विस्तारमा प्राथमिकता दिँदै टु जी सेवालाई विस्थापन गर्न लागेको हो ।
हालसम्म देशका ७७ जिल्लाका ७४४ स्थानीय तहमा नेपाल टेलिकमको फोर जी सेवा पुगिसकेको प्रबन्ध निर्देशक पहाडीले जानकारी दिइन् । कम्पनीले वायरलेस ब्रोडब्यान्ड सेवाको पहुँचलाई अझ विस्तार गर्दै आगामी दिनमा थप ३ सय ३३ वटा नयाँ ई नोड बी (बेस स्टेसन) निर्माणका लागि पूर्वाधार तयार गरिसकेको जनाएको छ । थप १२ सय यस्ता पूर्वाधार स्थापनाका लागि आवश्यक उपकरण खरिदको बोलपत्र अन्तिम चरणमा पुगेको पनि उल्लेख गरेको छ ।
प्रबन्ध निर्देशक पहाडीले फाइभ जी सेवा सञ्चालनका लागि उपयुक्त व्यवसायिक रणनीति सहितको अध्ययन सम्पन्न भई प्रतिवेदन पेश गर्ने कार्य अन्तिम चरणमा रहेको बताइन् । 'भविष्यमा सरकारको निर्देशन बमोजिम फाइभ जी प्रविधि भित्र्याउने कम्पनीको योजना छ,' उनले भनिन् ।
हालसम्म नेपाल टेलिकमका इन्टरनेट तथा डेटा सेवाका प्रयोगकर्ताको संख्या २ करोड ११ लाखभन्दा बढी पुगेको कम्पनीले जानकारी दिएको छ । यसमध्ये २ करोड ७ लाख जीएसएम मोबाइल डेटा प्रयोगकर्ता रहेको र फोर जी सेवा प्रयोग गर्ने १ करोड ६४ लाख ग्राहक रहेको पनि कम्पनीले जनाएको छ । नेपाल टेलिकमको एफटीटीएच डेटा सेवाका प्रयोगकर्ता भने ३ लाख छन् ।
