— बागमती प्रदेशसभामा प्रतिनिधित्व गर्ने दलहरूबीच प्राथमिकता हेरेर प्रतिपक्षका माग पूरा गर्ने सहमति जुटेको छ । मंगलबार बसेकाे सर्वदलीय बैठकले प्रदेशसभाको बुधबारबाट सुरु हुने बैठक सहजताका साथ अगाडि बढाउने सहमति गरेका हुन् ।
प्रदेश सभाका सभामुख भुवनकुमार पाठकको सक्रियतामा हेटौंडा–१० स्थित प्रदेशसभा सचिवालयमा बसेको सर्वदलीय बैठकले प्रमुख प्रतिपक्षी दल नेकपा माओवादी केन्द्रले उठाएका मागहरू अनुकूलता हेरेर पूरा गर्दै जाने सहमति भएको सरकारका प्रवक्ता एवं आन्तरिक मामिला तथा कानुनमन्त्री सुरजचन्द्र लामिछानेले जानकारी दिए ।
संसद् पनि चलाउँदै लैजाने, बजेटमा सम्बोधन नभएका विषयमा अर्थ मन्त्रालयसँग समन्वय गरेर सहमतिको वातावरण निर्माण गर्ने, असोज ११ र १२ गते विपद्का समयमा प्रतिपक्षी दलसँग गरिएको सहमति कार्यान्वयनमा लैजाने सहमति भएको उनले बताए ।
प्रमुख प्रतिपक्षी दल माओवादी संसदीय दलका नेता शालिकराम जमकट्टेलले आफ्ना मागका विषयमा छलफल मात्रै भएको तर सहमति भने नभएको दाबी गरेका छन् । उनले आगामी प्रदेशसभाको बैठकमा अवरोध भने नगर्ने बताए । ‘आगामी प्रदेशसभाको बैठकमा हामी अवरोध गर्दैनौं । तर, सरकारले आफ्नो प्रतिबद्धता पूरा गर्छ कि गर्दैन भन्ने हेर्न बाँकी छ,’ उनले भने ।
प्रदेशसभाको बैठक बुधबार बिहान ११ बजे बस्ने तय भएको र बैठकमा संसद् सचिवालयमा दर्ता भएका विधेयक पेस गर्ने कार्यसूची रहेको सभामुख भुवनकुमार पाठकले जानकारी दिए ।
सर्वदलीय बैठकमा बागमती प्रदेशका मुख्यमन्त्री बहादुरसिंह लामा, नेकपा एमाले संसदीय दलका नेता जग्गनाथ थपलियालगायतको सहभागिता थियो । माओवादी केन्द्रले आफ्नो नेतृत्वको सरकारले ल्याएको बजेट भए पनि चालु आर्थिक वर्षको बजेटमा विभिन्न माग राख्दै सरकारलाई दबाब दिइरहेको छ ।
