: शिक्षा, विज्ञान तथा प्रविधिमन्त्री विद्या भट्टराईले शिक्षालाई पहिलो प्राथमिकतामा राखेर लगानी गर्न सरकार प्रतिबद्ध रहेको बताएकी छन्।
नुवाकोटको विदुरमा प्रेस चौतारी नेपालले गरेको पत्रकार सम्मेलनमा शिक्षामन्त्री भट्टराईले शैक्षिक गुणस्तर अभिवृद्धि गर्न आवश्यक रहेको बताइन्। उनले यसका लागि अहिलेको लगानी पर्याप्त नभएको स्वीकार गरिन्।
‘अहिले शिक्षामा १० प्रतिशत मात्र सरकारको लगानी छ, यसलाई बढाउनुपर्छ, संघीय, प्रदेश र स्थानीय सरकार तीनै तहबाट शिक्षामा कति लगानी गर्ने भन्ने पनि सुनिश्चित गर्नुपर्छ,’ मन्त्री भट्टराईले भनिन्।
शिक्षालाई थप गुणस्तरीय बनाउन सरकारले लगानी बढाउनुपर्ने बेला आएको जनाउँदै मन्त्री भट्टराईले सामुदायिक विद्यालयको शैक्षिक स्तरोन्नतिका लागि समुदाय सचेत र जागरूक हुनुपर्नेमा जोड दिइन् नेपालका कतिपय स्थानमा विद्यार्थी संख्या घटेर विद्यालयमा भवन मात्रै बाँकी रहेको प्रसंगमा मन्त्री भट्टराईले समस्या देखिएको क्षेत्रको स्थानीय तहले जिम्मेवारी लिनुपर्ने बताइन्।
