: अमेरिकी विदेश विभागले पानामा नहरबाट गुज्रने अमेरिकी पानी जहाजहरूले कुनै शुल्क तिर्नु नपर्ने जनाएको छ। यसले वर्षेनी अमेरिकाको लाखौं डलर बचत हुने अमेरिकी विदेश मन्त्रालयले सामाजिक सञ्जालमा उल्लेख गरेको छ।
राष्ट्रपति डोनाल्ड ट्रम्पको दबाबपछि अमेरिकी जहाजले शुल्क बिना पनामा नहरबाट जान अनुमति पाएको हो।
अमेरिकी राष्ट्रपतिको रूपमा शपथ लिएपछिको पहिलो भाषणमा नै ट्रम्पले चीनले फेरि पनामा नहर सञ्चालन गरिरहेको दाबी गरेका थिए।
ट्रम्पले पनामा नहरबाट गुज्रने अमेरिकी जहाजहरूलाई लिइने भारी शुल्क बल प्रयोग गरेर भए पनि फिर्ता लिने धम्की पनि दिएका थिए।
उनले भनेका थिए, 'चीनले पानामा नहर सञ्चालन गरिरहेको छ। हामीले यो चीनलाई दिएका छैनौं। हामीले यो पानामालाई दिएका थियौं। फेरि फिर्ता लिने छौं।'
८२ किलोमिटर लामो पानामा नहर मध्य अमेरिकाको मध्य भागबाट बग्छ। यो प्रशान्त र एट्लान्टिक महासागरहरूलाई जोड्ने मुख्य कडी हो।
प्रत्येक वर्ष लगभग १४,००० पानी जहाजहरूले यस नहरलाई सर्टकटको रूपमा प्रयोग गर्छन्। नहर बन्नुअघि ती जहाजहरूले दक्षिण अमेरिका हुँदै लामो र महँगो यात्रा गर्नुपर्थ्यो। बीबीसी
