— अमेरिकामा अवैध रूपमा रहेका भारतीय आप्रवासी बोकेको जहाज विमान अवतरण गरेको छ । अमेरिकी सेनाको उक्त जहाज पञ्जाब प्रान्तको अमृतसरस्थित श्री गुरू रामदास जी अन्तराष्ट्रिय विमास्थलमा अवतरण गरेको हो ।
अमेरिकी सेनाको विमानबाट १ सय १६ आप्रवासी भारत आइपुगेका स्थानीय सञ्चार माध्यमहरूले जनाएका छन् । तीमध्ये २५ महिला र १२ बालबालिका रहेका जनाइएको छ । विमानमा ११ चालक दलका सदस्य र ४५ जना अमेरिकी अधिकारीहरू रहेका छन् ।
बुधबार भारत ल्याइएका आप्रवासीहरू पञ्जाव, गुजरात, हरियाणा, उत्तर प्रदेश र महाराष्ट्र प्रदेशका रहेका जनाइएको छ । तीमध्ये सबैभन्दा बढी ३३ जना गुजरातका छन् । पञ्जाबका ३२ जना रहेका जनाइएको छ । अन्य आप्रवासी उत्तर प्रदेश र महाराष्ट्रका भएका इन्डियन एक्सप्रेसले जनाएको छ ।
डोनाल्ड ट्रम्पले अमेरिकी राष्ट्रपतिको पद सम्हालसँगै अमेरिकाले गैरकानुनी आप्रवासीलाई उनीहरूकै देश फिर्ता गर्ने कार्य तीव्र पारेको छ । ट्रम्पले पदभार ग्रहण गरेलगत्तै अवैध आप्रवासीलाई डिपोर्ट गर्न कार्यकारी आदेशमा हस्ताक्षर गरेका थिए ।
यसअघि भारतीय विदेशमन्त्री एस जयशंकरले अमेरिकामा 'अवैध रूपमा' रहेका भारतीय नागरिकको 'न्यायसंगत फिर्ती' का लागि तयार रहेको बताएका थिए । अमेरिकी विदेशमन्त्री मार्को रुबियोसँगको भेटपछि यशंकरले पत्रकारहरूसँग कुरा गर्दै अमेरिकामा रहेका अवैध नागरिक फिर्ता लिन तयार रहेको बताएका थिए ।
पछिल्ला तथ्यांकहरू अनुसार भारतले अमेरिकामा रहेका १७ हजार ९ सय ४० अवैध वा कागजात नभएका भारतीयलाई फिर्ता ल्याउन ट्रम्प प्रशासनसँग काम गरिरहेको बताइएको छ ।
पिउ रिसर्च सेन्टरको तथ्यांकअनुसार अमेरिकामा गैरकानुनी रुपमा बसोबास गरिरहेकाहरूमा भारतीयको संख्या तेस्रो स्थानमा छ । पिउ रिसर्च सेन्टरका अनुसार अमेरिकामा अनुमानित ७ लाख २५ हजार कागजबिहीन भारतीय आप्रवासीहरू छन् । यो मेक्सिको र एल साल्भाडोरपछिको ठूलो संख्या हो ।
