। अभियान सुरु भएको दुई दिनमा ४ लाख ६४ हजार किशोरीले पाठेघरको मुखको क्यान्सरविरुद्ध एचपीभी खोप लगाएको छन् । मंगलबार र बुधबार गरी ४ लाख ६४ हजार ६२ जनाले एचपीभी खोप लगाएको स्वास्थ्य सेवा विभाग खोप शाखा प्रमुख डा.अभियान गौतमले जानकारी दिए ।
मंगलबारबाट खोप अभियान सुरु भएको थियो । दुई दिनमा लक्षित किशोरीमध्ये २८ प्रतिशतले खोप लगाइसकेका छन् । सबैभन्दा बढी कोशी प्रदेशमा ४४.९ प्रतिशतले खोप लगाएका छन् भने सबैभन्दा कम कभरेज कर्णाली प्रदेशमा ९.३ प्रतिशत छ ।
गौतमका अनुसार ७७ जिल्लामध्ये ७० जिल्लामा खोप अभियान सञ्चालन भइसकेको छ । विभिन्न प्रदेशका गरी ७ जिल्लामा सुरु भइसकेको छैन । कर्णाली प्रदेशका जुम्ला, हुम्ला र डोल्पामा खोप दिन सुरु गरिएको छैन । गण्डकी प्रदेशको मुस्ताङ र मनाङ साथै कोशी प्रदेशको संखुवासभा र इलाममा खोप अभियान सुरु हुन बाँकी छ ।
जुम्ला, इलाम र संखुवासभा जिल्लामा आइतबारबाट खोप दिइँदै छ । अन्य हिमाली जिल्लाहरुका अधिकारीहरुले भने फागुन महिनाबाट मात्रै सुरु गर्ने जानकारी दिएको गौतमले बताए । ‘ती जिल्लामा जाडो भएका कारण कतिपय ठाउँमा अहिले विद्यालय छुट्टी रहेछ फागुनबाट सुरु गर्छाैँ भन्नुभएको छ’ गौतमले भने।
फागुन १६ गतेसम्म चल्ने अभियानमा विद्यालयमा कक्षा ६ देखि १० सम्म अध्ययन गर्दै गरेका र विद्यालयबाहिर रहेका १० देखि १४ वर्ष उमेरका किशोरीलाई खोप दिइँदैछ ।
अभियानमा १६ लाख ८८ हजार ७६८ जनालाई खोप दिने लक्ष्य राखिएको छ । लक्षित जनसंख्याको कम्तिमा पनि ९० प्रतिशतलसम्म खोप पुर्याउने लक्ष्य राखिएको खोप शाखा प्रमुख गौतमले बताए ।
