— थाइल्यान्डले त्रिकोणात्मक महिला ट्वान्टी–२० क्रिकेट शृंखलाको ट्रफी जितेको छ । शुक्रबार भएको राउन्ड रोबिन लिगको अन्तिम खेलमा थाइल्यान्डले घरेलु टोली नेपाललाई ७ विकेटले पराजित गरेको थियो ।
टस जितेर ब्याटिङ रोजेको नेपालले कीर्तिपुरस्थित त्रिवि क्रिकेट मैदानमा २० ओभर खेल्दै ७ विकेट गुमाई ८१ रनमात्र बनाउन सक्यो । जबाफमा शीर्ष वरीयताको थाइल्यान्डले १७ ओभरमै लक्ष्य पूरा गरेको थियो । महिला ट्वान्टी–२० अन्तर्राष्ट्रिय वरीयतामा थाइल्यान्ड, १३, नेदरल्यान्ड्स १६ र नेपाल २० औं स्थानमा छ ।
थाइल्यान्ड ६ खेल खेल्दै पाँचौं विजयसहित विजेता बनेको हो । नेदरल्यान्ड्स ६ मध्ये ४ खेल जितेर दोस्रो भयो । नेपाल सबै ६ खेलमा पराजित भयो । सहभागी टोलीले एकअर्कासँग ३–३ पटक खेलेपछि सर्वाधिक अंक बटुल्ने टोली विजेता बन्ने प्रावधान थियो ।
लिगको अन्तिम खेलमा कप्तान नारुइमोल चाइवाईले अविजित २७ रन बनाएर थाइल्यान्डलाई विजय दिलाए । उनले ३४ बल खेल्दै २ चौका प्रहार गरिन् । नानापात कोन्चारोइन्काईले ३२ बलमा १ चौकासहित २३ र नताया बुचाथमले ११ रन बनाए । नेपालबाट कप्तान इन्दु बर्माले ४ ओभरमा १ मेडन राख्दै १६ रन खर्चेर २ र पूजा महतोले १ विकेट लिएका थिए ।
यसअघि नेपाली ब्याटिङ शृंखलामा खुल्न सकेन । ओपनर सम्झना खड्काले २९ बल खेल्दै १ चौकासहित सर्वाधिक १७ रन बनाइन् । विन्दु रावल ७, पूजा ६, रुबिना क्षेत्री १, इन्दु १०, कविता जोशीले १ चौका र १ छक्कासहित १४ रन र एलिसा यादव शून्यमा आउट भए । सीता रानामगर १० बलमा ७ र ‘डेब्यु’ गरिरहेकी राजमति ऐरी १७ बलमा ११ रन बनाएर अविजित रहे ।
थाइल्यान्डकी थिपात्चा पुथावोङ प्लेयर अफ द सिरिजमा चुनिन् । अन्तिम खेलमा कुनै विकेट नलिए पनि उनले शृंखलाको यसअघिका ५ खेलमा ५.८१ को औसतमा १६ विकेट लिएकी थिइन् । नेपालको उत्कृष्ट खेलाडीमा पूजा महतो चुनिएकी थिइन् । उनले १ सयमाथिको स्ट्राइक रेटमा १ सय ३४ रन बनाउनु साथै ३ विकेट लिएकी थिइन् । उनलाई प्रमुख प्रायोजकको तर्फबाट यामाहा स्कुटर प्रदान गरिएको थियो ।
