: गैरकानुनी तरिकाले बस्दै आएका तीन नेपालीलाई स्पेनले निष्कासन गरेको छ। बिना कागजात काम गरेर बस्ने उनीहरूलाई स्पेनको अध्यागमनले पक्राउ गरी निष्कासन गरेको हो।
निष्कासित हुनेमा मोहन ओली, नुरुपा छिरिङ घले र सुस्मिता घर्ती रहेका छन्। उनीहरूलाई गत साता काठमाडौं फर्काइएको स्रोतले बताएको छ। ओलीलाई कतार एयरलाइन्सको विमान, घले र घर्तीलाई इन्डियन एयरलाइन्सको विमानबाट नेपाल फर्काइएको हो।
युरोपका विभिन्न देशहरूमा गैरकानुनी तरिकाले प्रवेश गरी लुकीछिपी काम गर्ने नेपालीहरूको संख्या धेरै छ। युरोपमा खोलिएका नेपाली संस्थाहरूले पनि अवैध तरिकाले बसोबास गर्ने नेपालीहरू धेरै रहेको बताउँदै आएको छ। त्यस्ता नेपालीहरूलाई बेलाबखत छापा मारी अध्यागमन प्रहरीले नियन्त्रणमा लिने गरेको नेपालीहरूको भनाइ छ।
माघ पहिलो साता पनि पाँच जना नेपालीलाई स्पेनले निष्कासित गरेको थियो। निष्कासनमा पर्नेमा अनिल बिसी, चिरञ्जिवी शाही, प्रेमराजा बोहोरा, बेलबहादुर कार्की र लोकेन्द्र केसी रहेका थिए। कतार एयरलाइन्सको जहाजबाट उनीहरूलाई नेपाल फर्काइएको थियो।
अध्यागमन कानुन उल्लंघन गरेको आरोपमा उनीहरूलाई स्पेनले निष्कासन गरेको थियो। उनीहरू चारै जनासँग पासपोर्टसमेत नरहेको बताइएको छ। पासपोर्ट फ्याँकेर लुकीछिपी काम गर्दै आएका उनीहरूलाई स्पेनको अध्यागमनले निष्कासन गरेको हो।
