: मधेश प्रदेशका मुख्यमन्त्री सतिष कुमार सिंहले जनकपुरधामको अवैधानिक रूपमा सञ्चालित मुस्कान अस्पताल बन्द गर्न निर्देशन दिएका छन्।
अस्पतालमा पित्तथैलीको अप्रेसन गरेको बिरामीको २० दिनसम्म होस खुल्न नसकेको समाचार प्रकाशन भएपछि मुख्यमन्त्रीले अस्पताल अनुगमन गरेर सिल गरेर साँचो बुझाउन निर्देशन दिएका हुन्।
मुख्यमन्त्रीले शुक्रबार ११ बजे राति अनुगमन गरी बन्द गर्न निर्देशन दिएका हुन्। गत माघ ३ गते नै पित्त थैलीको अप्रेसन गरेकी सर्लाही हरिपुर्वा नगरपालिका-५ की पबिता कुमारी राय यादव अहिले मृत्यु शय्यामा जुधिरहेकी छन्।
मुख्यमन्त्री सिंहले शुक्रबार राति अस्पताल अनुगमन गरी दर्ताबिनै सञ्चालनमा रहेको अस्पतालका सञ्चालकलाई बोलाउन तथा अस्पतालमा भएका बिरामी अन्य अस्पतालमा सिफ्ट गरेर शनिबार ९ बजेसम्म अस्पतालको साँचो सरकारलाई बुझाउन निर्देशन दिएका बताइएको छ।
