। इजरायल र हिजबुल्लाहबीच भएको युद्धविरामकाबीच पूर्वी लेबनानमा इजरायलले आक्रमण जारी राखेको छ । पछिल्लो समय इजरायलले गरेको हवाई आक्रमणमा परी ६ जनाको मृत्यु भएको छ भने दुई जना घाइते भएका छन् ।
लेबनानको राष्ट्रिय समाचार एजेन्सीका अनुसार शनिबार मात्रै पूर्वी लेबनानको जेन्नाटा सहर नजिकैको शारा क्षेत्रलाई लक्षित गरी इजरायली सेनाले आक्रमण गरेको हो ।
इजरायली सेनाले हिजबुल्लाहबाट युद्धविराम सम्झौताको उल्लंघन भएको बताउँदै आक्रमण गरिरहेको छ । सेनाले एक विज्ञप्ति जारी गर्दै ‘रणनीतिक हतियार उत्पादन र भण्डारण गर्ने स्थलभित्र’ हिजबुल्लाहका कार्यकर्ता भएको दाबी गरेको छ ।
गत नोभेम्बर २७ मा इजरायली सेना र हिजबुल्लाहबीच भएको द्वन्द्व अन्त्य गर्ने गरी भएको युद्धविराम सम्झौतालाई सङ्केत गर्दै विज्ञप्तिमा भनिएको छ, ‘ हतियार भण्डारण र उत्पादन स्थलभित्रका गतिविधिलाई इजरायल र लेबनानबीचको समझदारीको ठाडो उल्लङ्घन मानिएको छ ।’
यो सम्झौता लागू भएदेखि नै इजरायलले हिजबुल्लाहका ती स्थानहरुमा सैन्य कारबाही जारी राखेको छ।
सम्झौतामा ६० दिनको कार्यान्वयन अवधि जनवरी २६ मा समाप्त हुने भनिएको थियो । तर, इजरायलले लेबनानले सम्झौतापूर्ण रूपमा कार्यान्वयन नगरेको भन्दै दक्षिणी लेबनानबाट आफ्ना सेना फिर्ता गर्न ढिलाइ गरेको थियो ।
युद्धविरामको सर्तअनुसार लेबनानी सेनाले हिजबुल्लाह सेनाको स्थानमा दक्षिणमा संयुक्त राष्ट्रसंघका शान्ति सैनिकसँगै तैनाथ गर्ने भएको छ ।
इजरायलले पूर्वी बेका घाटीमा पनि आक्रमणको लहर चलाएको छ, जुन सामान्यतया हिजबुल्लाहको गढ मानिन्छ । गत जनवरी ३१ मा इजरायली सेनाले सिरियासँगको सीमा नजिक हिजबुल्लाहका विभिन्न स्थानमा आक्रमण गरेको दाबी गर्दा कम्तीमा दुई जनाको मृत्यु भएको थियो ।
हिजबुल्लाहका अधिकारी इब्राहिम मौसावीले त्यस समयमा भएको हवाई आक्रमणको निन्दा गर्दै यसलाई ‘अत्यन्त खतरनाक उल्लंघन र स्पष्ट र स्पष्ट आक्रमण’को संज्ञा दिंदै लेबनानलाई इजरायलको निरन्तर आक्रमण रोक्न आह्वान गरेका छन् ।
