: वीरगन्जको नारायणी अस्पतालमा ५ सय शय्याको भवन निर्माणका लागि सर्वोच्च अदालतले ५ वर्षपछि निकास दिएपछि वीरगन्जमा दीप प्रज्वलन कार्यक्रम गरेर खुशीयाली मनाइएको छ।
सोमबार साँझ नारायणी अस्पतालका चिकित्सक, स्वास्थ्यकर्मी, कर्मचारी, नागरिक समाजका अगुवा,राजनीतिक दलका नेताकार्यकर्ता, विभिन्न संघसंस्थाका प्रतिनिधि लगायतले घण्टाघर चोकमा दीप प्रज्वलन गरेर खुसीयाली मनाएका हुन्।
नारायणी अस्पतालमा सरकारले पाँच वर्ष पहिले नै ५ सय शय्याको भवन निर्माण गर्ने भनेर आवश्यक बजेट निकास गरे पनि सहरी विकास तथा भवन निर्माण विभाग र ठेकेदार कम्पनी बीचको विवादका कारण उक्त मुद्दा सर्वोच्च अदालतमा अड्किएर बसेको थियो। सोमबार सर्वोच्च अदालतका न्यायाधीशद्वय हरि फुयाँल र सुनिल पोखरेलको संयुक्त इजलासले विभागको पक्षमा फैसला गर्दै भवन निर्माणको नयाँ प्रक्रिया थाल्न बाटो खोलिदिएपछि वीरगन्जवासीले त्यसैको खुशीयालीमा दीप प्रज्वलन गरेका हुन्।
दीप प्रज्वलन कार्यक्रममा सहभागी भवन निर्माण संघर्ष समितिका संयोजक समेत रहेका नारायणी अस्पतालका चिकित्सक डा. नीरज सिंहले सर्वोच्च अदालतको फैसलाले सम्पूर्ण वीरगन्जवासी हर्षित भएको बताए। उनले भने,‘५ वर्षसम्म अन्योलमा रहेको अस्पतालको भवन अब बन्छ भन्ने विश्वास जागेको छ। तर हामीले अब भवन निर्माणको नयाँ प्रक्रिया तत्काल थाल्न सरकारलाई खबरदारी गरिरहन्छौं। भवन निर्माणको काम सुरु नभएसम्म हाम्रो दबाब र खबरदारी निरन्तर जारी रहन्छ।’
पूर्व प्रदेश सभा सदस्य राजेश्वर साह तेलीले सर्वोच्च अदालतको फैसला स्वागतयोग्य रहेको बताए। उनले भने,‘वीरगन्जका हकमा अन्य महत्वाकांक्षी परियोजनाका मुद्दा सर्वोच्चमा वर्षौंदेखि विचाराधीन छन्। अब ती मुद्दाको पनि सर्वोच्चले छिट्टै छिनोफानो गरिदिनुपर्छ।’ त्यसका लागि पनि वीरगन्जवासीले यस्तै दबाब र खबरदारी अभियान सुरु गर्नुपर्ने उनको भनाइ थियो।
नारायणी अस्पतालका सूचना अधिकारी वरिष्ठ चिकित्सक डा. उदयनारायण सिंहले नारायणी अस्पतालको पक्षमा आएको सर्वोच्च अदालतको फैसला सम्पूर्ण वीरगन्जवासीका लागि खुशीको विषय भएको बताए।
