इजरायली बन्धकहरूको रिहाइ रोक्ने हमासले घोषणा गरेलगत्तै अमेरिकी राष्ट्रपति ट्रम्पले हमासलाई युद्धविराम अन्त्य गर्ने चेतावनी दिएका थिए। अहिले इजरायली प्रधानमन्त्री बेन्जामिन नेतन्याहुले पनि हमासलाई धम्की युद्ध सुरु गर्ने धम्की दिएका छन्।
नेतन्याहुले भने, 'यदि हमासले शनिबार दिउँसोसम्म हाम्रा बन्धकहरूलाई रिहा गरेन भने हामी गाजामा युद्धविराम समाप्त गर्नेछौं र फेरि लडाईं सुरु गर्नेछौं।'
नेतन्याहुले इजरायली सेनालाई गाजा र वरपर भेला हुन आदेश दिएका छन्। बन्धकहरूको रिहाइ रोक्ने हमासको घोषणापछि उनले यो कदम चालेका बीबीसी समाचारमा उल्लेख छ।
नेतन्याहुले शनिबारसम्ममा बाँकी रहेका सबै ७६ बन्धकहरूको रिहाइ मागिरहेका हुन् कि शनिबार छाड्ने भनिएको तीन जनाको रिहाइको बारेमा मात्र कुरा गरिरहेका छन् भन्ने कुरा स्पष्ट पारेनन्। तर उनका एक मन्त्रीले भने सबैजनाको रिहाइको कुरा गरेको जनाएका छन्।
हमासले सोमबार इजरायलले युद्धविराम सम्झौता उल्लङ्घन गरेकोले बन्धकहरूको रिहाइ रोकिएको जनाएको थियो। यो आरोप भने इजरायलले अस्वीकार गरेको छ।
यसपछि अमेरिकी राष्ट्रपति डोनाल्ड ट्रम्पले यदि हमासले बन्धक बनाइएका सबै नागरिकहरूलाई रिहा नगरे इजरायलले उसँगको युद्धविराम सम्झौता रद्द गर्ने चेतावनी दिएका थिए।
हमास र इजरायलबीचको युद्धविराम सम्झौता जनवरी १९ मा लागू भएको थियो। हमासले त्यसयता १६ इजरायली र पाँच थाई बन्धकहरूलाई रिहा गरिसकेको छ। बदलामा इजरायलले ५६६ प्यालेस्टिनी कैदीहरूलाई रिहा गरेको छ।
