— नेपाल विद्युत् प्राधिकरणकाे भूमिगत लाइन विस्तारका क्रममा बुधबार मेलम्ची खानेपानीकाे पाइपमा क्षति पुग्दा चार घण्टामा ३० लाख लिटर पानी सडकमा बगेको छ ।
काठमाडौं उपत्यका खानेपानी लिमिटेड(केयुकेएल) का अनुसार करिब चार घण्टा पाइपबाट लगातार पानी बाहिर निस्केपछि बबरमहलको सडक, सरकारी कार्यालय र निजी घरहरु जगलमग्न भएको थियो ।
मेलम्चीबाट अहिले काठमाडौं उपत्यकामा दैनिक १७ करोड लिटर पानी ल्याइएको छ । केयुकेएलका प्रमुख कार्यकारी अधिकृत(सिइओ) अशोक पौडेलका अनुसार मेलम्चीबाट ल्याइएको पानी सुन्दीजलस्थित प्रशोधन केन्द्रबाट थोक वितरण प्रणालीमा पठाइएको ७५ किमि पाइप लाइनमा रहेको सवै पानी बबरमहल क्षेत्रमा बगेको थियो । करिव २४ देखि ३० लाख लिटर पानी खेर गएको पौडेलले जानकारी दिए ।
उनका अनुसार अहिले पानी बन्द गरिएको छ भने भोलि बेलुकीसम्म क्षतिग्रस्त पाइप मर्मत गरेर पानी वितरण गर्ने तयारी गरिएको छ । प्राधिकरणले ठेक्कामार्फत काम गर्ने क्रममा तार विछ्याउने जमिन खन्ने क्रममा मेशिनले पाइप भेटेपछि पानी बाहिर निस्केको थियो । ग्रील गर्ने क्रममा २० इन्चको पाइपमा मेशिन अड्केको थियो ।
पानीले जिल्ला अदालत काठमाडौं अगाडि सडक र वन परिसरभित्र रहेका सरकारी कार्यालयहरूसमेत डुबानमा परेका थिए ।
