— दक्षिण कोरियाले चिनियाँ एआई च्याटबट ‘डिपसिक’को डाउनलोडमा प्रतिबन्ध लगाएको छ । दक्षिण कोरियाको व्यक्तिगत जानकारी सुरक्षा आयोगका अनुसार डिपसिकले डेटा संरक्षणको कानुन सुधार गर्न आवश्यक छ । आयोगले सुधारको आग्रह गर्दै, सुधार नभएसम्म कोरियाली प्रयोगकर्ताका लागि उपलब्ध नहुने बताएको हो ।
गत साता डिपसिक विश्वभर चर्चित भएपछि दक्षिण कोरियामा पनि यसका प्रयोगकर्ता तीव्र रुपमा बढेका थिए । एप स्टोरको शीर्ष स्थानमा पुगेको यो एप सातामा १० लाखभन्दा बढीले डाउनलोड गरेका थिए । तर यो एपले व्यक्तिगत गोपनियता र राष्ट्रिय सुरक्षासँग सम्बन्धित चिन्ताहरु ल्याएको कारण विभिन्न देशहरुले यसमा प्रतिबन्ध लगाएका छन् ।
दक्षिण कोरियाका केही सरकारी निकायहरूले आफ्ना कर्मचारीलाई काम गर्ने उपकरणहरूमा डिपसिक डाउनलोड गर्न नदिने निर्णय गरेपछि शनिबार साँझदेखि यो एप एप्पल स्टोर र गुगल प्ले स्टोरमा उपलब्ध छैन ।
दक्षिण कोरियाका कार्यवाहक राष्ट्रपति चोई सांग–मोकले डिपसिकलाई ‘सक’ अर्थात झड्का भन्दै यसले एआई मात्रै नभई अन्य उद्योगहरूमा पनि प्रभाव पार्न सक्ने बताएका छन् । यद्यपि, पहिल्यै डाउनलोड गरिएको डिभाइसमा भने एप प्रयोग गर्न मिल्छ र यसको वेबसाइट पनि प्रयोग गर्न सकिन्छ ।
दक्षिण कोरिया मात्र होइन, ताइवान र अस्ट्रेलियाले पनि यसलाई सरकारी उपकरणहरूमा प्रतिबन्ध लगाएका छन् । इटालीको नियामक निकायले पनि डिपसिकलाई यसको गोपनीयता नीति सुधार गर्न आग्रह गरेको छ । सुधार नहुन्जेल एप स्टोरमा डिपसिक उपलब्ध नहुने नियामक निकायले जनाएको छ ।
त्यसैगरी, अमेरिकामा सांसदहरूले सरकारी उपकरणहरूमा डिपसिक प्रतिबन्ध लगाउने प्रस्ताव राखेका छन् । टेक्सास, भर्जिनिया र न्यूयोर्क राज्यमा सरकारी कर्मचारीहरूलाई एप प्रयोग गर्न नदिने नियम लागू भइसकेको छ ।
