— रोबर्ट लेवनडोस्कीले पेनाल्टीबाट गरेको एक मात्र गोलमा बार्सिलोनाले स्पेनी ला लिगामा रायो भालेकानोलाई सोमबार १–० ले पराजित गरेको छ र अंक तालिकाको शीर्षमा उक्लिएको छ ।
तीन साना अगाडिसम्म बार्सिलोना लिगको शीर्ष स्थानबाट सात अंक टाढा थियो । तर यसबीच दुई म्याड्रिड क्लबले आफ्नो लय गुमाएपछि बार्सिलोनालाई फाइदा पुगेको हो । रियल र एटलेटिको म्याड्रिड दुवैले पछिल्लो खेल पनि बराबरी खेलेका थिए । लेवनडोस्कीले २८ औं मिनेटमा निर्णायक गोल गरे र यो उनको सिजनको २० औं गोल रह्यो ।
‘सबै खेलाडीले मिहिनेत गरेका छन् । त्यसैले यो जितमा खुसी छौं । अहिले हामी फेरि शीर्ष स्थानमा उक्लेका छौं, त्यसैले हाम्रो प्रदर्शन अझ राम्रो हुनु पर्नेछ,’ प्रशिक्षक हान्सी फ्लिकले प्रतिक्रया दिएका छन् । सन् २०२५ लागेयता बार्सिलोना १२ खेलमा अपराजित छ ।
लयमा रहेको रायोको भने १० खेलको अपराजित यात्रा टुंगिएको छ । यही प्रदर्शनका कारण टिम लिग तालिकाको छैटौं स्थानमा छ । शीर्षमा बार्सिलोनाको २४ खेलबाट ५१ अंक छ । रियलको पनि समान ५१ अंक नै छ भने एटलेटिको ५० अंक रहेको छ ।
