इजरायली बन्धक शिरी बिबासको परिवारले शुक्रबार हमासले इजरायललाई हस्तान्तरण गरेको शव शिरीकै भएको पुष्टि गरेको छ।
परिवारले जारी गरेको विज्ञप्तिमा भनिएको छ, 'हाम्री शिरीलाई बन्दी बनाएको बेला हत्या गरिएको थियो। उनी अहिले घर फर्किएकी छिन्।'
यद्यपि शवको जाँच गर्ने इजरायली फोरेन्सिक अधिकारीहरूले अझैसम्म उक्त शव शिरी बिबासको हो भनेर पुष्टि गरेका छैनन्।
बिबासको परिवारले भन्यो, 'हामी १६ महिनादेखि यो निश्चितताको खोजीमा थियौं र अब हामीले यो पाएका छौं। यसमा कुनै खुशी छैन।'
हमासले शुक्रबार साँझ रेडक्रसलाई एउटा शव हस्तान्तरण गरेको थियो।
यसअघि बिहीबार हमासले चारवटा शव पठाएको थियो। यी मध्ये एउटा शव शिरी बिबासको भएको दाबी गरिएको थियो। तर इजरायलले गरेको अनुसन्धानपछि त्यो शव एक अज्ञात महिलाको भएको पत्ता लाग्यो।
यस सम्बन्धमा इजरायलले हमासमाथि युद्धविराम सम्झौताका सर्तहरू उल्लङ्घन गरेको आरोप लगाएको थियो।
७ अक्टोबर २०२३ मा हमासले ३३ वर्षीया शिरी बिबासलाई उनका दुई छोराछोरी, ५ वर्षीया एरियल र २ वर्षीय काफिरसँगै बन्धक बनाएको थियो।
