— लुका मोडरिचले लामो दूरीबाट गरेको प्रहार उत्कृष्ट गोलमा परिणत भएपछि रियल म्याड्रिडले आइतबार स्पेनी ला लिगामा जिरोनालाई २–० ले हराएको छ । यो जितसँगै लिग तालिकाको शीर्षमा रियलले बार्सिलोनासँग अंक बराबरी गरेको छ ।
सान्टियागो बर्नाबाउमा रियलको प्रदर्शन शानदार रह्यो र खेलको अन्त्यतिर कार्लो एन्सेलोटीको टिमका लागि भिनिसियस जुनियरले दोस्रो गोल थपे । खेलपछि मोडरिचले प्रतिक्रिया दिएका छन्, ‘उपाधि होडमा कायम रहन यो निकै महत्त्वपूर्ण जित रह्यो ।’
बार्सिलोना र रियल दुवैको यो नतिजापछि समान ५४ अंक भएको छ । एटलेटिको म्याड्रिड भने ५३ अंकमा तेस्रो स्थानमा रह्यो । आइतबारका अन्य खेलमा एथलेटिक बिलबाओले रियल भालाडोलिडलाई ७–१, रियल बेटिसले गेटाफेलाई १–० र रियल सोसिडाडले लेगानेसलाई ३–० ले हरायो ।
