— आर्सनलको इंग्लिस प्रिमियर लिग उपाधि होडमा गम्भीर धक्का लागेको छ । दस खेलाडीमा सीमित आर्सनललाई वेस्ट ह्यामले १–० ले पराजित गरेको हो ।
पहिलो हाफमा जारोड बोवेनले गरेको एक मात्र गोल निर्णायक रह्यो ।
इमिरेट्समा भएको खेलको ७३ औं मिनेटमा मेयलेस लेविस–स्केलीलाई रातो कार्ड देखाइएको थियो । यो हारको अर्थ दोस्रो स्थानमा रहेको आर्सनल शीर्षको लिभरपुलसँग आठ अंकको दूरीमा रह्यो ।
खेलपछि आर्सनलका प्रशिक्षक मिखेल आर्टेटाले भनेका छन्, ‘म निकै धेरै निराश छुं । यो नतिजा हाम्रो लागि वास्तवमै ठूलो धक्का हो ।’ आइतबार लिभरपुलले म्यानचेस्टर सिटीको सामना गर्दैछ । अर्को खेलमा न्युकासल युनाइटेडले नटिङ फरेस्टविरुद्ध खेल्नेछ । शनिबारका अन्य खेलमा एस्टन भिल्लाले चेल्सीलाई २–१ ले हरायो ।
यस्तै ब्राइटनले साउथह्याम्पटनलाई ४–०, टोटनहमले इपस्विच टाउनलाई ४–१, क्रिस्टल प्यालेसले फुलहमलाई २–० र उल्भ्सले बर्नमाउथलाई १–० ले हरायो । एभरटन र म्यानचेस्टर युनाइटेडबीचको खेल भने २–२ को बराबरीमा समाप्त भयो ।
