— विराट कोहलीको अविजित १ सय रनमा भारतले च्याम्पियन्स ट्रफी क्रिकेटमा आइतबार पाकिस्तानलाई ६ विकेटले पराजित गरेको छ । कोहलीले एकदिवसीय अन्तर्राष्ट्रियमा आफ्नो ५१ औं शतक बनाएपछि भारतले २ सय ४२ रनको लक्ष्य ४३ औं ओभरमा २ सय ४४ रन बनाउँदै पूरा गरेको थियो ।
लगातार दोस्रो हारपछि डिफेन्डिङ च्याम्पियन पाकिस्तान प्रतियोगिताबाट बाहिरिने खतरा प्रबल बनेको छ । पाकिस्तान पहिलो खेलमा न्युजिल्यान्डसँग पनि पराजित रहेको थियो ।
लगातार दोस्रो विजयसँगै भारतले सेमिफाइनलमा पुग्ने सम्भावनालाई बलियो बनाएको छ । सहभागी ८ टोलीलाई २ समूहमा विभाजन गरिएको छ र समूहका शीर्ष २ टोली सेमिफाइनलमा पुग्ने प्रावधान छ ।
भारतबाट कप्तान रोहित शर्माले २० रन मात्र बनाउन सके । अर्का ओपनर शुबमन गिलले ५२ बल खेली ७ चौकासहित ४६ रन बनाए । श्रेयश ऐरले पनि अर्धशतक बनाए । कोहलीसँग तेस्रो विकेटमा १ सय १४ रन जोडेका ऐरले ६७ बल खेली ५ चौका र १ छक्कासहित ५६ रन बनाए । हार्दिक पाण्ड्या ८ रनमा आउट भए । पाकिस्तानबाट साहिन अफ्रिदीले २ विकेट लिए ।
आफ्नो इनिङ्सका क्रममा कोहली एकदिवसीय अन्तर्राष्ट्रियमा १४ हजार रन पूरा गर्ने तेस्रो खेलाडी बनेका थिए । पाकिस्तानसँगको खेल अगाडि कोहलीले २ सय ९८ एकदिवसीय अन्तर्राष्ट्रियमा १३ हजार ९ सय ८५ रन बनाएका थिए । भारतकै सचिन तेन्दुलकर (१८,४२६ रन) र श्रीलंकाका कुमार सांगाकारा (१४,२३४) ले एकदिवसीय अन्तर्राष्ट्रियमा कोहलीले भन्दा बढी रन बनाएका छन् ।
जुनमा अमेरिका र वेस्ट इन्डिजमा भएको ट्वान्टी–२० विश्वकपमा भारतलाई उपाधि दिलाएपछि कोहली र रोहित दुवैले ट्वान्टी–२० अन्तर्राष्ट्रियबाट संन्यास लिएका थिए । यी दुवै खेलाडी टेस्ट र एकदिवसीय अन्तर्राष्ट्रियमा आफ्नो उत्कृष्ट फर्म निकाल्न संघर्ष गरिरहेका थिए । रन बनाउन नसक्दा यी दुवैले चाँडै संन्यास लिने हल्ला चलेका थिए ।
यसअघि साउद सकिल र मोहम्मद रिजवानले डटेर खेले पनि पाकिस्तान ४९.४ ओभरमा २ सय ४१ रनमै अलआउट भएको थियो । सकिलले ६२ र कप्तान रिजवानले ४६ रन बनाउँदै ढिला गरे पनि तेस्रो विकेटमा १ सय ४ रनको महत्त्वपूर्ण साझेदारी गरेका थिए । सकिलले ७६ बल खेली ५ चौका र रिजवानले ७७ बल खेली ३ चौका प्रहार गरे ।
ओपनरद्वय इमाम उल हक २६ बलमा १० र बाबर आजम २६ बल खेली ५ चौका प्रहार गरी २३ रनमा आउट भएका थिए । सलमान अघा १९ र तैयब ताहिर ४ रनमा आउट भए पनि देब्रेहाते खुसदिल साहले ३९ बलमा २ छक्का प्रहार गर्दै ३८ रन बनाएपछि स्लो पिचमा पाकिस्तानको स्कोर चुनौतीपूर्ण देखिएको थियो ।
देब्रेहाते स्पिनर कुलदीप यादवले ९ ओभरमा ४० रन खर्चेर ३ विकेट लिए । पाण्ड्याले ८ ओभरमा ३१ रन खर्चेर २ तथा हर्षित राना, अक्षर पटेल र रवीन्द्र जडेजाले १–१ विकेट लिए । च्याम्पियन्स ट्रफीको आयोजक पाकिस्तान भ्रमण गर्न अस्वीकार गरेको भारतले प्रतियोगिताको सबै खेल यूएईमा खेल्नेछ ।
