— बर्लिन अन्तर्राष्ट्रिय फिल्म फेस्टिभल (बर्लिनाले)मा ‘ड्रोमर’ले गोल्डेन बियर जितेको छ । यौनिक तथा अल्पसंख्यक समुदाय(क्वेयर)को प्रेमकथामा आधारित यो फिल्मले फेस्टिभलको सबैभन्दा ठूलो अवार्ड जितेको हो । फिल्ममा यस्तो एक किशोरीको कथा देखाइएको छ, जो आफ्नो महिला शिक्षकसँग प्रेममा पर्छिन् । मुख्य प्रतिस्पर्धामा ‘ड्रोमर’सँग १८ फिल्मले प्रतिस्पर्धा गरेको थियो ।
त्यस्तै यो वर्ष ‘सिल्भर बियर ग्रान्ड जुरी प्राइज’ फिल्म ‘द ब्लु ट्रेल’ले जित्दा ‘सिल्भर बियर जुरी प्राइज’ भने ‘द मेसेज’ले पायो । ‘लिभिङ द ल्यान्ड’बाट हुओ मोङले उत्कृष्ट निर्देशकको सिल्भर बियर अवार्ड उचाल्दा रोज ब्रनले ‘इफ आइ ह्याड लेग्स इ वुड किक यु’बाट ‘सिल्भर बियर फोर बेस्ट लिडिङ पर्फमेन्स’को अवार्ड उचालिन् ।
चर्चित निर्देशक रिचर्ड लिंकलेटर निर्देशित फिल्म ‘ब्लु मुनबाट अभिनेता एन्ड्रु स्कटले ‘बेस्ट सपोर्टिङ पर्फमेन्स’का लागि सिल्भर बियर जिते । रडु जुडेले ‘कन्टिनेन्टल २५’बाट उत्कृष्ट पटकथाका लागि सिल्भर बियर जित्दा कलामा गरिएको योगदानका लागि ‘द आइस टावर’बाट लुसिल हाचिहालेलोभिच सिल्भर बियर उचालिन् ।
बर्लिनालेको ७५ औं संस्करणमा यो वर्ष ‘कोकी साओ’बाट क्वेन्टन मिलरले ‘कुपरा फिल्ममेकर अवार्ड, बर्लिनाले सर्ट्स’ जित्यो । त्यस्तै, ‘सिल्भर बियर जुरी प्राइज’ युरिक्को मिसुसुरीले जितिन् । उत्कृष्ट सर्टतर्फ ‘गोल्डेन बियर’ भने ‘लोयड वङ, अनफिनिस्ड’ले जित्यो । जुरी बर्लिनाले डकुमेन्ट्री अवार्डतर्फ ‘होल्डिङ लियाट’ले स्पेशल मेन्सन पाउँदा प्रस्पेक्टिभ्स जुरीतर्फ ‘द डेभिल्स स्मोक्स’ले अवार्ड उचाल्यो ।
