— अमेरिकी अर्बपति इलन मस्क नेतृत्वको सरकारी दक्षता विभाग 'डज'ले अमेरिकाका सरकारी कर्मचारीलाई एक साताभित्र आफुले गरेका उपलब्धि सूचीवद्ध गर्न वा राजीनामा दिन आग्रह गरेका छन् ।
सरकारी कर्मचारीहरूलाई शनिबार पठाइएको एक इमेलमा उनीहरूलाई गत साताका उपलब्धिबारे विस्तृत जानकारी गराउन वा राजीनामा दिन आग्रह गरिएको हो । यो डोनाल्ड ट्रम्प प्रशासनले संघीय कर्मचारीलाई लक्ष्य गरी चालेको पछिल्लो कदम हो ।
यसअघि मस्कले एक सातासम्म कर्मचारीहरूले के-के काम गरे भन्ने बुझ्नका लागि उनीहरूलाई इमेल पठाउने भन्दै ट्वीट गरेका थिए । त्यसलगत्तै कर्मचारीले त्यस्तो इमेल पाप्त गरेका थिए । 'इमेलको उत्तर दिन असफल भएमा त्यसलाई राजीनामाका रूपमा लिइनेछ,' उनले लेखेका थिए ।
डोनाल्ड ट्रम्पले राष्ट्रपतिको दोस्रो कार्यकाल सुरू गरेसँगै कार्यकारी आदेशमार्फत डज स्थापना गरेका हुन् । त्यसलगत्तै ट्रम्पले अर्बपति मस्कलाई डजको नेतृत्वका लागि चयन गरेका हुन् । सरकारी खर्च कटौती गर्ने उद्देश्यले डजको स्थापना गरिएको हो ।
डज प्रमुख मस्कले सरकारी खर्च कटौतीका लागि आक्रामक रूपमा कर्मचारीहरूलाई बर्खास्त गर्ने र कोषहरूलाई निलम्बन गर्ने कार्यको नेतृत्व गर्दै आएका छन् ।
अन्तर्राष्ट्रिय सञ्चार माध्यमहरूका अनुसार ट्रम्पले कन्जर्भेटिभ पोलिटिकल एक्सन कन्फरेन्स (सीप्याक) मा बोलेको केही समयमै संघीय कर्मचारीहरूलाई इमेल प्राप्त भएको हो । कर्मचारीलाई प्राप्त इमेलको विषयमा 'गत साता तपाईंले के गर्नुभयो ?' भनेर लेखिएको छ । बीबीसीका अनुसार उक्त इमेल पठाउनेमा एचआर अर्थात् जनशक्ति व्यवस्थापन गर्ने निकाय उल्लेख गरिएको छ ।
इमेलमा कर्मचारीलाई सोमबार मध्यरातअघि गोप्य जानकारीको खुलासा नगरी पाँच वटा बुँदामा एक साताभित्र गरेका काम तथा उपलब्धिबारे उल्लेख गर्न भनिएको बीबीसीले जनाएको छ । तर इमेलमा भने जबाफ दिन असफल भएमा त्यसलाई राजीनामा मानिने विषयमा भने केही उल्लेख गरिएको छैन ।
अमेरिकी संघीय सरकारको जनशक्ति व्यवस्थापन गर्ने निकाय अफिस अफ पर्सोनेल म्यानेजमेन्ट (ओपिएम) ले कर्मचारीहरूलाई इमेल पठाइएको पुष्टि गरेको छ । ओपिएमले संघीय जनशक्ति दक्ष र जवाफदेही बनाउने ट्रम्प प्रशासनको प्रतिबद्धतालाई अघि बढाउने हिस्साका रूपमा कर्मचारीहरूलाई इमेलमार्फत एक साता उनीहरूले गरेका कामको विवरण मागिएको जनाएको छ ।
संघीय कर्मचारीहरूको प्रतिनिधित्व गर्ने सबैभन्दा ठूलो कर्मचारी संघ 'अमेरिकन फेडेरेसन अफ गभर्नमेन्ट इम्प्लोइज' ले कर्मचारीलाई इमेल पठाउने कद 'क्रूर र अनादरपूर्ण' भएको र संघीय सेवाका कर्मचारीलाई कुनै पनि तरिकाले 'गैरकानुनी रूपमा हटाउने' कार्यलाई कानुनी चुनौती दिने वताएको छ ।
'एकपटक फेरि इलन मस्क र ट्रम्प प्रशासनले संघीय कर्मचारी र उनीहरूले अमेरिकीहरूलाई प्रदान गर्ने महत्वपूर्ण सेवाको घोर अपमान गरेका छन्,' युनियनका अध्यक्ष एभरेट केलीद्वारा जारी विज्ञप्तिमा भनिएको छ ।
