। पाकिस्तानमा जारी आईसीसी च्याम्पियन्स ट्रफी क्रिकेटमा लगातार दोस्रो जित निकाल्दै न्युजिल्याण्ड सेमिफाइनलमा प्रवेश गरेको छ । सोमबार भएको समूह ए को खेलमा न्युजिल्याण्डले बंगलादेशलाई ५ विकेटले हराएको हो ।
न्युजिल्याण्डको यस जितले भारत पनि एक खेल खेल्नुअगावै सेमिफाइनलमा प्रवेश गरेको छ । अब भारत र न्युजिल्याण्डबीच हुने खेलको विजेता समूहविजेता हुनेछ ।
बंगलादेशले दिएको २३७ रनको लक्ष्य न्युजिल्याण्डले ४६.१ ओभरमा ५ विकेटको क्षतिमा पूरा गर्यो । रचिन रविन्द्रले शतकीय पारी खेले । उनले १०५ बलमा १२ चौका र १ छक्कासहित ११३ रन बनाए ।
त्यस्तै टम लेथमले ५५ रन बनाए । न्युजिल्याण्ड ७२-३ मा भएको अवस्थाबाट यी दुईले शतकीय साझेदारी गरेका थिए । बंगलादेशका तास्किन अहमद, रिशाद होसेन, नहिद राना र मुस्तफिजुर रहमानले १-१ विकेट लिए ।
त्यसअघि टस हारेर पहिले ब्याटिङको निम्तो पाएको बंगलादेशले ५० ओभरमा ९ विकेट गुमाएर २३६ रन बनाएको थियो । कप्तान नजमुल हसन शान्तोले ७७ रन बनाए । जाकेर अलीले ४५ रन बनाए ।
न्युजिल्याण्डका माइकल ब्रेसवेलले १० ओभरमा २६ रन दिएर ४ विकेट लिए । विलियम ओरुर्केले २ तथा म्याट हेनरी र काइल जेमिसनले १-१ विकेट लिए ।
योसँगै समूह ए बाट भारत र न्युजिल्याण्ड सेमिफाइनलमा पुग्दा पाकिस्तान र बंगलादेश एक खेलअगावै बाहिरिएका छन् ।
