— रुसी राष्ट्रपति भ्लादिमिर पुटिनले कब्जामा लिएका युक्रेनी भू-भागसहित रुसका दुर्लभ खनिजहरूको उत्खननका लागि अमेरिकासँग सहयोगको प्रस्ताव गरेका छन् ।
सोमबार राति एक टेलिभिजन अन्तर्वार्तामा राष्ट्रपति पुटिनले युक्रेन युद्धबारे ट्रम्पको दृष्टिकोणको प्रशंसा गर्दै अमेरिकालाई रुसको खनिज स्रोत उत्खननको प्रस्ताव राखेका बीबीसीले जनाएको छ । रुस-युक्रेन युद्ध अन्त्यबारे दुई देशबीच पहल भइरहेका बेला पुटिनले अमेरिकाका लागि नयाँ प्रस्ताव राखेका हुन् ।
युक्रेनको सुरक्षा ग्यारेन्टीको बदलामा अमेरिका र युक्रेनले पृथ्वीका दुर्लभ धातुहरूमा पहुँच प्रदान गर्ने सम्झौतानजिक पुगेको अनुमानबारे पुटिनले अमेरिकासँग मिलेर त्यस्ता धातुको प्रयोग गर्न आमन्त्रित गरेका छन् ।
पुटिनले भने, 'यो प्रस्ताव युक्रेनको रुसी कब्जामा रहेका क्षेत्रहरूमा खनिज स्रोतहरू उत्खननमा पनि लागू हुन्छ ।' त्यसका साथै उनले अमेरिकी कम्पनीहरूले रूसमा ऊर्जा र आल्मुनियम उत्पादनजस्ता परियोजनामा भाग लिनुपर्ने पनि बताए ।
सरकारी टिभी संवाददाताले ट्रम्पले 'रूसका हातमा खेलेका हुन् ?' भनेर सोधेको प्रश्नको जवाफमा पुटिनले आफ्नो दृष्टिकोण फरक रहेको बताएका हुन् । ट्रम्पले 'युक्रेनको हितमा, युक्रेनी राज्यको हितमा, युक्रेनी राज्यको रक्षा गर्न' काम गरिरहेको पुटिनको भनाइ छ ।
युक्रेनी राष्ट्रपति भ्लोदिमिर जेलेन्स्कीले पद छाड्नुपर्ने ट्रम्पको भनाइमा रुसी राष्ट्रपति पुटिन पनि सहमत देखिएका छन् । युक्रेनी राष्ट्रपति युक्रेनमा 'सेना, समाज र राज्यलाई भ्रष्ट बनाउने कारक' भएको पुटिनको दाबी छ ।
'अमेरिकी राष्ट्रपतिलाई पक्कै पनि यो थाहा छ,' पुटिनले भने, 'वास्तवमा रुसले जेलेन्स्की त्यहाँ रहिरहेको र शासनलाई भ्रष्ट बनाइरहेको हेर्न चाहन्छ।
