: आइसीसी च्याम्पियन्स ट्रफीअन्तर्गत समूह बीबाट अष्ट्रेलिया सेमिफाइनल प्रवेश गरेको छ। अफगानस्तानसँग भएको खेलमा वर्षाका कारण अंक बाँडिएपछि अष्ट्रेलिया ४ अंकसहित सेमिफाइनल प्रवेश गरेको हो।
पाकिस्तानको लाहोरमा भएको खेलमा २७४ रनको लक्ष्य पछ्याएको अष्ट्रेलियाले १२.५ ओभरमा १ विकेटको क्षतिमा १०९ रन बनाउँदा खेल वर्षाका कारण रोकिएको हो । अष्ट्रेलियाका लागि म्याथ्यू सर्टले १५ बलमा ३ चौका र १ छक्कासहित २० रन बनाएर क्याच भए । ट्राभिस हेडले ४० बलमा ९ चौका र १ छक्कासहित ५९ रनमा अविजित थिए। कप्तान स्टेभन स्मिथले २२ बलमा १९ रनमा अविजित हुँदा खेल वर्षाले रोकिएको हो ।
त्यसअघि, ब्याटिङ गरेको अफगानस्तानले निर्धारित ५० ओभरमा सबै विकेट गुमाउँदै २७३ रन बनाएको थियो । अफगानस्तानका लागि सदिकुल्ला अतलले सर्वाधिक ८५ रनको पारी खेले । उनले ९५ बलमा ६ चौका र ३ छक्का प्रहार गरे। अजमतुल्ला ओमराजाइले ६३ बलमा १ चौका र ५ छक्कासहित ६७ रन बनाए ।
कप्तान हस्मतुल्ला शाहिदीले २०, ओपनर इब्राहिम जाद्रनले २२, रासिद खानले १९ र रहमत शाहले १२ रन बनाए । अन्य खेलाडीले भने दोहोरो अंकमा रन जोड्न सकेनन्।
यो खेलमा अंक बाँडेसँगै अफगानस्तानको सेमिफाइनल सम्भावना निकै झिनो अंकगणितमा मात्रै सिमित भएको छ । दक्षिण अफ्रिका र इङ्ल्यान्डको खेलपछि भने सेमिफाइनल खेल्ने टिमको निर्धारण हुनेछ । शनिबार हुने दक्षिण अफ्रिका र इङ्ल्यान्डसँगको खेलमा इङ्ल्यान्डले सामान्य जित मात्रै दर्ता गरेमा पनि दक्षिण अफ्रिका सेमिफाइनल पुग्नेछ । यदि इङ्ल्यान्डले दक्षिण अफ्रिकालाई फराकिलो अन्तरले हराएमा मात्रै अफगानस्तानको सेमिफाइनल सम्भावना रहनेछ ।
समूह ए बाट भने भारत र न्युजिल्यान्ड सेमिफाइनल प्रवेश गरिसकेका छन् । पाकिस्तान र बंगलादेश प्रतियोगिताबाट बाहिरिसकेका छन् ।
