— अमेरिकाले मंगलबारदेखि क्यानडा र मेक्सिकोबाट आयात हुने विभिन्न वस्तुमा २५ प्रतिशत आयातकर लागू गरेको छ । अमेरिकी राष्ट्रपति डोनाल्ड ट्रम्पले क्यानडा र मेक्सिकोले गैरकानुनी आप्रवासन र अवैध फेन्टनाइलको तस्करी नरोकेको भन्दै एक आयातकर लगाएका हुन् ।
क्यानाडेली ऊर्जा उत्पादनमा भने १० प्रतिशत कर लगाइएको छ । त्यस्तै, चीनबाट हुने आयातमा पनि १० प्रतिशत कर थप गरिएको छ । ट्रम्पले दोस्रो कार्यकालमा पहिलोपटक कंग्रेसको संयुक्त सत्रलाई सम्बोधन गर्नुभन्दा केही घण्टा अघिदेखि नयाँ कर कार्वान्यनमा ल्याइएको हो ।
ट्रम्पले ह्वाइट हाउसमा आफ्नो दोस्रो कार्यकाल सुरू गर्दै विदेशी वस्तुहरूमा चर्को कर लगाउने घोषणा गरेका थिए । ट्रम्पले यसअघि नै चीन र युरोपेली संघबाट अमेरिका भित्रने सामानहरूमा १० प्रतिशत कर लगाउने बताइसकेका छन् ।
अमेरिकी निर्णयको क्यानडा र चीनले तत्काल प्रतिक्रिया दिएका छन् । क्यानडाले १ खर्ब ५५ अर्ब डलर बराबरका अमेरिकी सामानहरूमा २५ प्रतिशत आयात करको घोषणा गरेको छ ।
त्यस्तै, चीनले कुखुरा, सुँगुर, भटमास र गाईको मासु लगायतका प्रमुख अमेरिकी कृषि उत्पादनहरूको आयातमा १५ प्रतिशत सम्मको अतिरिक्त शुल्क लगाउने घोषणा गरेको छ । त्यस्तै, चीनले करिब दुई दर्जन अमेरिकी कम्पनीहरूमा निर्यात नियन्त्रण र अन्य प्रतिबन्धहरू पनि लगाएको छ । चीनले नयाँ कर तथा प्रतिन्धहरू १० मार्चदेखि लागू हुने जनाएको छ ।
