— भारत लगातार तेस्रो पटक च्याम्पियन्स ट्रफी क्रिकेटको फाइनलमा पुगेको छ । विराट कोहलीको उच्च प्रदर्शनप्रेरित भारतले मंगलबार दुबईमा भएको पहिलो सेमिफाइनलमा अस्ट्रेलियालाई ४ विकेटले पराजित गरेको थियो ।
२ सय ६५ रनको लक्ष्य पछ्याउनेक्रममा ३६ वर्षे कोहलीले ८४ रन बनाएका थिए । खेलको अन्त्यतिर उनी आउट भए पनि केएल राहुलले अविजित ४२ रन बनाएपछि भारतले दुबई अन्तर्राष्ट्रिय रंगशालामा ११ बलअघि नै २ सय ६७ रन बनाएको थियो ।
भारत लगातार तीन पटक फाइनल पुग्ने पहिलो टोली बनेको छ । यसअघि भारत २०१३ र २०१७ मा फाइनल पुगेको थियो । ८ वर्षयता च्याम्पियन्स ट्रफी पहिलो पटक आयोजना भएको हो । अस्ट्रेलियामाथि विजय हात पार्दै भारतले सन् २०२३ मा घरेलु भूमिमा एकदिवसीय विश्वकप फाइनलमा भोगेको पराजयको बदला पनि लिएको छ ।
दक्षिण अफ्रिका र न्युजिल्यान्डबीच बुधबार लाहोरमा हुने दोस्रो सेमिफाइनल विजेतासँग भारतले उपाधिका लागि प्रतिस्पर्धा गर्नेछ । फाइनल दुबईमा आइतबार हुनेछ ।
आठ राष्ट्र सहभागी प्रतियोगिताको आयोजनास्थल पाकिस्तान जान अस्वीकार गरेको भारतले आफ्ना खेल दुबईमा खेल्दै आएको छ । भारत फाइनल नपुगेको भए पाकिस्तानको लाहोरलाई फाइनलको वैकल्पिक खेलस्थलको रूपमा राखिएको थियो ।
शुभमन गिल ८ र कप्तान रोहित शर्मा २९ बलमा २८ रन बनाई आउट भए पनि कोहली र श्रेयस ऐरले तेस्रो विकेटमा ९१ रनको साझेदारी गरेर भारतलाई फाइनलतर्फ डोर्याएका थिए । ऐरले ६२ बल खेल्दै ३ चौकासहित ४५ रन बनाए । प्लेयर अफ द म्याच कोहलीले ९८ बल खेलेर ५ चौका प्रहार गरे । कोहली ५१ रनमा हुँदा ग्लेन म्याक्सवेलले क्याच छाड्नु अस्ट्रेलियाका लागि महङ्गो पर्यो ।
अक्षर पटेल २७ रनमा आउट भए । तर राहुल र हार्दिक पाण्ड्येले ३१ बलमा ३४ रन जोडेर भारतमाथिको दबाब हटाएका थिए । भारतलाई जितका लागि ६ रन आवश्यक हुँदा आउट भएका हार्दिकले २४ बल खेल्दै १ चौका र ३ छक्कासहित २८ रन बनाए । केएल राहुलले विजयी छक्का प्रहार गरे । उनले ३४ बल खेल्दै समान २ चौका र छक्का प्रहार गरे ।
यसअघि टस जितेर ब्याटिङ रोजेको अस्ट्रेलिया ४९.३ ओभरमा २ सय ६४ रनमै अलआउट भयो । ट्राभिस हेडले तीव्र गतिमा ३९ रन बनाएपछि कप्तान स्टिभ स्मिथले ७३ र एलेक्स क्यारीले ६१ रन थपेका थिए । भारतबाट मोहम्मद सामीले ३, स्पिनरद्वय बरुण चक्रवर्ती र रवीन्द्र जडेजाले २–२ विकेट लिएका थिए ।
