: दर्ता नभई सञ्चालन गरिएको दुईवटा अस्पताल बन्द गरिएको छ। अनुगमनका क्रममा दुईवटा अस्पताल दर्ता नभई सञ्चालन भएको पाइएपछि तत्काल सिल लगाएर बन्द गरिएको उद्योग तथा वाणिज्य कार्यालय नुवाकोटका प्रमुख किशोर सापकोटाले जानकारी दिए। उनका अनुसार तादी ४ सातविसेस्थित दुप्चेश्वर नेपाल हस्पिटल प्रालि दर्ता नै नगरी सञ्चालन गरिएको पाइएपछि जरिवाना गरिनुका साथै तत्काल बन्द गरिएको छ।
सो अस्पताल सिल लगाउनुका साथै २० हजार रुपैयाँ जरिवाना गरिएको छ। यस्तै पञ्चकन्या गापा २ सहरेटारमा रहेको माइलक डायनोस्टिक अस्पताल दर्ता नै नगरी सञ्चालन गरिएपछि बन्द गरिएको अधिकृत सापकोटाले जानकारी दिए।
संयुक्त बजार अनुगमन टोलीले मंगलबार नुवाकोटको पूर्वी भेगमा रहेको तादी, दुप्चेश्वर र पञ्चकन्या गाउँपालिकाको विभिन्न बजारमा रहेका अस्पताल, किराना पसल, भेटेरिनरी तथा खाद्यान्न सप्लायर्सहरूको स्थलगत अनुगमन गरेको थियो। सहायक प्रमुख जिल्ला अधिकारी कृष्णप्रसाद हुमागाइको नेतृत्वमा गएको संयुक्त टोलीले विभिन्न ११ वटा अस्पताल तथा पसलहरूमा अनुगमन गरिएको उद्योग वाणिज्य कार्यालय नुवाकोटले जनाएको छ।
संयुक्त बजार अनुगमन समितिद्वारा तादी गापा ३ खरानीटार, तादी ४ सातबिसे, दुप्चेश्वर ६ र पन्चकन्या गापा २ सहरेटार संयुक्त बजार अनुगमन गरिएको हो। टोलीले तीनवटा अस्पताल, चारवटा किराना तथा खाद्यान्न पसल, चारवटा भेटेरिनरी पसल अनुगमन गरेको हो।
