— गृह मन्त्रालयले सात सहसचिवको सरुवा तथा पदस्थापन गरेको छ। बिहीबार मन्त्रालयले नुवाकोटका प्रमुख जिल्ला अधिकारी रामकृष्ण अधिकारीलाई गृहमन्त्रालय तानेर नुवाकोटसहित ६ जिल्लामा प्रमुख जिल्ला अधिकारी (सीडीओ) तोकेको हो ।
जसअनुसार लामो समयदेखि रिक्त रहेका ओखलढुंगा र खोटाङले पनि सीडीओ पाएका छन् ।
ओखलढुंगाको सीडीओमा विजयराज सुवेदीलाई पठाइएको छ भने खोटाङमा नरहरि घिमिरेलाई खटाइएको छ । बाँकेको सीडीओमा धर्मराज जोशीको पदस्थापन भएको छ ।
त्यस्तै, रौतहटको सीडीओमा विनोदकुमार खड्का, संखुवासभाको सीडीओमा दिव्यराज पोखरेल र नुवाकोटको सीडीओमा शशीधर घिमिरेलाई पठाइएको छ ।
