: प्रधानमन्त्री कप क्रिकेट प्रतियोगितामा सुदूरपश्चिम प्रदेशलाई ७९ रनले हराउँदै कर्णालीले प्रतियोगिताको पहिलो जित हात पारेको छ।
कर्णालीका बायाँ हाते स्पिनर दीपेन्द्र रावतले सुदूरको ब्याटिङ धरापमा पारेका हुन्। उनले ९ ओभरमा ३ मेडनसहित ३३ रन खर्चिएर ७ विकेट लिएका हुन्। लमही क्रिकेट रंगशालामा टस जितेर ब्याटिङ गरेको कर्णालीले १५५ रन बनाएको थियो।
कर्णालीले दिएको १५६ रनको विजयी लक्ष्य पछ्याएको सुदूर २१ ओभरमा ७६ रन बनाउँदै अलआउट भयो। सुदूरपश्चिम प्रदेशका लागि खडक बोहोराले सर्वाधिक २७ रन बनाए। उनले २५ बलमा ३ चौका प्रहार गरे। ओपनर टेक रावत ६ रनमा सीमित भए। किरण ठगुन्नाले र कप्तान शेर मल्लले समान १३ रन बनाए। शेर मल्ल १३ रनमा अविजित रहे।
कर्णालीका लागि दिवान पुनले २ विकेट लिए। त्यसअघि, ब्याटिङ गरेको कर्णालीका लागि अर्जुन घर्तीले सर्वाधिक ७१ रन बनाए। उनले ९४ बलमा समान ३ चौका र ३ छक्का प्रहार गरे। शीर्ष क्रम नचल्दा मध्यक्रममा अर्जुनले राम्रोसँग क्रिज सम्हाले। दिनेश अधिकारीले १७ रन बनाए। कप्तान दिवान पुनले १२ रन बनाए। त्यसबाहेक अन्य कुनै ब्याटरले दोहोरो अंकमा रन बनाउन सकेनन्।
सुदूरका लागि हेमन्त धामीले सर्वाधिक ४ विकेट लिए। नारायण जोशीले २ विकेट लिँदा शेर मल्ल, मिलान बोहोरा र भोज राज भट्टले समान १–१ विकेट लिए।
