: प्रधानमन्त्री कप पुरुष राष्ट्रिय प्रतियोगितामा कोशी प्रदेशलाई १६५ रनले हराउँदै मधेश प्रदेशले विजयी सुरुवात गरेको छ। सिद्धार्थनगरस्थित सिद्धार्थ रंगशाला टस जितेर ब्याटिङ गरेको मधेशले निर्धारित ५० ओभरमा ६ विकेट गुमाउँदै २८४ रन बनाएको थियो।
मधेशले दिएको २८५ रनको बलियो लक्ष्य पछ्याएको कोशीले ३३ ओभरमा ११९ रन बनाउँदै अलआउट भएको हो। कोशीका दुवै ओपनर डकआउट हुँदा तेस्रो क्रमका ब्याटर सकिब हकले सर्वाधिक २५ रन बनाए। उनले ४७ बलमा २ चौका प्रहार गरे।
सुजन थपलियाले २४, फिर्दोस अन्सारीले २१ रन बनाउँदा दिपेश कँडेल २० रन बनाउँदै बोल्ड भए। मधेशका लागि रुपेश सिंहले उत्कृष्ट बलिङ स्पेल देखाए। उनले ९ ओभरमा २९ रन खर्चेर ५ विकेट लिए।
राजेश यादवले ३ विकेट लिँदा हरिशंकर शाह र प्रदिप पाश्वानले १–१ विकेट लिए। त्यसअघि ब्याटिङ गरेको मधेशका लागि पवन सरार्फले सर्वाधिक ९२ रन बनाए। ८५ बलमा ११ चौका र २ छक्का प्रहार गरे।
कप्तान अनिल शाह र पवन सरार्फको उत्कृष्ट पारीमा मधेशले निर्धारित ५० ओभरमा ६ विकेट गुमाउँदै २८६ रन बनाएको हो। ओपनर अनिल शाहले ७५ बलमा १० चौकासहित ७५ रन बनाए। अर्का ओपनर मयन यादवले १० रन बनाउँदै क्याच भए। रुपेश सिंह इनिङ्सको अन्तिम बलमा १० रन बनाउँदै क्याच आउट भए। डेब्युटेन्ट दिपेश दास ५६ रनमा अविजित रहे।
कोशी प्रदेशका लागि विपिन महतो र प्रकाश कार्कीले समान २–२ विकेट लिए। फिर्दोस अन्सारी र दीपेश कँडेलले १–१ विकेट लिए। कोशी पहिलो खेलमा लुम्बिनी प्रदेशसँग २६ रनले पराजित भएको थियो।
