साउदी अरेबियामा अमेरिका-युक्रेनबीच भएको वार्तामा युक्रेनले रुससँग तत्काल ३० दिने युद्धविराम गर्ने प्रस्ताव स्वीकार गरेको छ।
युक्रेन युद्ध अन्त्य गर्न मंगलबार अमेरिकी र युक्रेनी अधिकारीहरूबीच बैठक भएको छ। यसपछि युक्रेनले अमेरिकाको ३० दिने युद्धविराम प्रस्ताव स्वीकार गरेको युक्रेनी राष्ट्रपति भ्लोदिमिर जेलेन्स्कीले पुष्टि गरेका छन्।
राष्ट्रपति जेलेन्स्कीले भने, 'यो प्रस्ताव सकारात्मक कदम हो। युक्रेन यसलाई स्वीकार गर्न पूर्ण रूपमा तयार छ। अब यसका लागि रुसलाई मनाउनु अमेरिकाको जिम्मेवारी हो। मस्कोले सहमति जनाएपछि युद्धविराम तुरुन्तै लागू हुनेछ।'
अमेरिकी विदेशमन्त्री मार्को रुबियो र राष्ट्रिय सुरक्षा सल्लाहकार माइक वाल्ट्जले साउदी अरेबियाको जेद्दामा भएको बैठकमा युक्रेनका धेरै सम्झौता प्रस्तावहरूबारे छलफल गरेको बताएका छन्। युक्रेनी अधिकारीहरू रुसद्वारा कब्जा गरिएको क्षेत्रको विषयमा भने कुनै पनि सम्झौताको लागि तयार देखिएनन्।
रुसी राष्ट्रपति भ्लादिमिर पुटिन पूर्वी युक्रेनका चार ठूला क्षेत्रहरू (डोनेट्स्क, लुहान्स्क, खेरसन र जापोरिजिया) मा पूर्ण नियन्त्रण चाहन्छन्। रुसले पहिले नै युक्रेनको २०% भूभाग कब्जा गरिसकेको छ।
अमेरिका-युक्रेन वार्तामा भएका निर्णयहरूमा युद्धविराम हवाई र समुद्रीलगायत सबै क्षेत्रमा लागू हुने जनाइएको छ। त्यस्तै वाचा गरिएअनुसार अमेरिकाले रुसलाई युद्धविराममा सहमत हुन मनाउने प्रयास गर्नेछ। अमेरिकाले युक्रेनको लागि सैन्य सहयोग तथा गुप्तचर जानकारी आदान प्रदान गर्न रोकेको थियो। वार्तामा युक्रेनले अमेरिकाबाट सैन्य सहयोग र गुप्तचर जानकारी प्राप्त गर्ने कुरा पनि सम्झौता भएको छ।
त्यस्तै दुर्लभ खनिज सम्झौता सकेसम्म चाँडो पूरा गर्न अमेरिका र युक्रेनबीच सहमति भएको छ।
