। राष्ट्रिय स्वतन्त्र पार्टी (रास्वपा) सांसद डा. चन्दा कार्की भण्डारीले गायक भूपू पाण्डेको ‘जीन्दगी चल्न त चल्या छ, पिरै पिरमा छ’ बोलको गीत सुनेर आत्मालोचना गर्न सुझाव दिएकी छिन् ।
आइतबार प्रतिनिधिसभा बैठकको शून्य समयमा बोल्ने क्रममा उनले जनताको आक्रोशलाई बेवास्ता गर्ने हो भने सरकारले अझै चर्को मूल्य चुकाउनुपर्ने जिकिर गरिन् ।
देशमा भ्रष्टाचार, कानुनी विभेद, अन्याय, महंगी, बेरोजगार लगायत बढ्दै गएको उल्लेख गर्दै सरकारको ध्यानाकर्षण गराइन् ।
‘देशमा भ्रष्टाचारले जरा गाडेको गाड्यै छ । राजनीतिक आडमा कानुनी विभेद बढेको छ । न्याय खोज्नेले अन्याय खप्नुपरेको छ । जनता महंगी, बेराजगारीको मारमा छन् । काठमाडौं विश्वकै चौथो प्रदूषित सहर बन्न पुगेको छ । तर, सरकार कहाँ छ ?,’ सांसद कार्कीको प्रश्न छ ।
जनताको पीडा सुन्नुपर्ने बेलामा सरकार आफ्ना सुविधा बढाउने खेलमा मस्त रहेको आरोप लगाइन् ।
‘जनताको पीडा सुन्नुको सट्टा सरकार आफ्ना सुविधा बढाउने खेलमा मस्त छ । नयाँ नेतृत्वलाई सिध्याउने र होच्याउने खेलमा जुटेको छ । देशलाई उज्यालो पार्ने कर्मचारीमाथि खनिएको छ,’ सांसद कार्कीले भनिन्, ‘राजाको आह्वानमा सडकमा जनता ओर्ले भनेर गालीगलौजमा व्यस्त छ ।’
उनले नेपाली जनता कुनै राजा फर्काउन नभई नेताहरूकै अकर्मण्यता र भ्रष्टाचारबाट निराश र दिक्क भएको बताइन् ।
‘तर, नेपाली जनता कुनै राजा फर्काउने होइन, नेताहरूकै अर्कमण्यता र भ्रष्टाचारले निराश र दिक्क भएर सडकमा निस्केका हुन्,’ कार्कीले भनिन् ।
यस्ता सन्दर्भ सुनाउँदै उनले गायक भूपू पाण्डेको ‘जीन्दगी चल्न त चल्या छ, पिरै पिरमा छ’ बोलको गीत सम्झिइन् ।
‘श्री भूपु पाण्डेको जीन्दगी चल्न त चल्या छ, पिरै पिरमा छ भन्ने गीतले जनताको पीर मर्काको हुबहु बयान गर्छ । सरकारले कमसेकम यो गीत सुनेर आत्मालोचना गर्दै सच्चियोस्,’ उनले भनिन्, ‘किनकी जनताको यो आक्रोशलाई अझै बेवास्ता गरियो भने यसको मूल्य अझै चुकाउनुपर्ने हुनेछ । त्यो मूल्यको जिम्मेवारी सरकारले नै बोक्नुपर्नेछ ।’
