। नेकपा एमालेका सांसद रघुजी पन्तले सरकारका मन्त्रीहरु फेर्न सुझाव दिएका छन् । सरकारप्रति प्रश्न उठ्दा मन्त्रीहरुले स्पष्ट जवाफसमेत दिन नसकेको भन्दै उनले मन्त्रीहरु फेर्न सुझाव दिएका हुन् ।
आजको संसद बैठकमा सांसदहरुले सरकारले विशिष्ट पदाधिकारीहरुको सेवा सुविधा बढाउने कानुन ल्याउन लागेको भन्दै सरकारको आलोचना गरेका थिए ।
सर्वोच्चको आदेशपछि विशिष्टहरुलाई सेवा सुविधा दिने विधेयकको ड्राफ्ट डेढ वर्षदेखि कानुन मन्त्रालयमा थन्किएर बसेको तर यसबारे मन्त्रीहरुले नबोलेको भन्दै रघुजीले असन्तुष्टि जनाए ।
‘म त मन्त्रीहरुको पारा देखेर छक्क पर्छु । हिजो प्रकाशमान जीले पाल्पामा गएर बोल्नुभएको छ अहिले भइरहेको छैन भनेर । आएर त्यही कुरा बोले भयो नि संसदमा । संसदमा उठेपछि रेस्पोन्स त गर्नुपर्छ,’ पूर्वमन्त्री समेत रहेका पन्तले भने, ‘कसरी बनेको, किन बनेको, के कारणले बनेको हो, कुन अवस्थामा छ र सरकारको सोच के छ ? पटकपटक प्रश्न उठेपछि मन्त्रीहरुले कानमा तेल हालेर बस्न मिल्छ ?’
मन्त्रिपरिषदले जनताको सेवा गर्न सकेको छैन भने मन्त्रिपरिषदका सदस्य फेर्नुपर्ने उनले बताए । उनले जनताको चासो र भावनालाई सम्बोधन गर्न प्रधानमन्त्रीलाई समेत सुझाव दिँदै उनले भने, ‘म प्रधानमन्त्रीलाई पनि आग्रह गर्दछु । जनताको चासोलाई सम्बोधन गरौं, जनताको भावनालाई सम्बोधन गरौं । लोकतन्त्र भनेको जनभावना अनुसार अगाडि बढ्ने हो ।’
‘उहाँको क्याबिनेटले राम्ररी जनताको सेवा गर्न सकेको छैन भने यो प्रधानमन्त्रीय व्यवस्था हो, मन्त्रीहरु फेर्ने बेला आयो । पर्फमेन्स देखाउन नसक्ने मन्त्रीहरु राखिराख्न जरुरी छैन । प्रधानमन्त्रीले निश्चय पनि मूल्यांकन गर्नु भएको होला,’ उनले भने ।
