: स्कुल बसको ठक्करबाट आइतबार साँझ मोरङमा १ जना बालिकाको मृत्यु भएको छ।
मोरङ प्रहरीका प्रवक्ता डीएसपी वेदप्रकाश जोशीका अनुसार सुनवर्षी नगरपालिका–१ कमलपोखरीस्थित भित्री सडक खण्डमा प्याराडाइज बोर्डिङ स्कुलको ना ४ ख ८८४३ नम्बरको बसले दुर्घटना गराएको हो। साइकलमा यात्रा गरिरहेकी बालिकालाई स्कुल बसले ठक्कर दिएको उनले बताए।
जोशीले दुर्घटनामा परेर सुनवर्षी–१ का राजकुमार परियारकी छोरी ९ वर्षीया सञ्जु परियारको मृत्यु भएको जानकारी दिए। केचनाबाट शुक्रबारेतर्फ जाँदै गरेको बसले विपरीत दिशाबाट आउँदै गरेको साइकललाई साँझ ५ बजेतिर ठक्कर दिँदा बालिका घाइते भएकी थिइन्।
गम्भीर घाइते उनलाई उपचारका लागि उर्लाबारीको मंगलबारेस्थित मदन भण्डारी अस्पताल एवं ट्रमा सेन्टर लगिएको थियो। अस्पताल पुर्याउनसाथ साँझ ६ बजेतिर चिकित्सकले मृत घोषित गरेको प्रहरीले जनाएको छ।
प्रहरीले बस र चालक मोरङको सुनवर्षी–१ शुक्रबारेका अन्दाजी ३६ वर्षीय राजेन्द्र राईलाई नियन्त्रणमा लिएको छ। दुर्घटनालगत्तै राई फरार बनेका थिए। खोजतलास गरेर उनलाई पक्राउ गरिएको र घटनाको थप अनुसन्धान सुरु गरिएको जोशीले बताए।
