: प्रधानमन्त्री कप पुरुष राष्ट्रिय प्रतियोगितामा नेपाल पुलिस क्लबले सुदूरपश्चिम प्रदेशलाई ६१ रनले पराजित गरेको छ।प्रतियोगितामा पुलिसको यो पाँचौं जित हो। हालसम्म अपराजित रहेको पुलिसका लागि बायाँ हाते स्पिनर ललित राजवंशीको स्पिन अट्याक नायक बन्यो। उनले ७ ओभरमा १६ रन खर्चिएरमा ६ विकेट लिए।
सिद्धार्थनगरस्थित सिद्धार्थ क्रिकेट रंगशालामा टस जितेर ब्याटिङ गरेको नेपाल पुलिसले दिएको १६१ रनको लक्ष्य पछ्याएको सुदूरपश्चिम प्रदेश २८.३ ओभरमा ९९ रनमा अलआउट भएको हो।
सुदूरका लागि शेर मल्लले सर्वाधिक ३२ रन बनाए। उनले ३७ बलमा ६ चौका प्रहार गरे। ओपनर ब्याटर टेक रावतले १२ रन बनाए। मिलन बोहोराले ४३ बलमा २ चौका सहित २३ रन बनाए। अन्य कुनै पनि ब्याटरले दोहोरो अंकमा रन बनाउन सकेनन्। पुलिसका लागि सागर ढकालले २ र करण केसीले १ विकेट लिए।
त्यसअघि ब्याटिङ गरेको पुलिस ४७ ओभरमा १६० रन बनाउँदै अलआउट भएको थियो। पुलिसका लागि कप्तान दिपेन्द्र सिंह ऐरीले सर्वाधिक ४२ रन बनाए। उनले ४७ बलमा ५ चौका प्रहार गर्दै क्याच आउट भएका हुन्।
ओपनर अर्जुन साउद २ रन र अर्का ओपनर कुशल भुर्तेल डक आउट हुँदा अमित श्रेष्ठले १८ रन बनाए। आरिफ शेखले ४० रनको पारी खेल्दै प्रधानमन्त्री कपमा १ हजार रन पूरा गर्ने खेलाडीको सूचीमा आफ्नो नाम दर्ता गराएका छन्। उनी प्रधानमन्त्री कप क्रिकेटमा १ हजार रन पूरा गर्ने छैटौं खेलाडी हुन्।
दिलिप नाथले १९ रन सागर ढकालले २२ रन बनाए। अन्य कुनै पनि ब्याटरको ब्याटबाट दोहोरो अंकमा रन बन्न सकेन। सुदूरपश्चिमका लागि सौर्य श्रेष्ठले सर्वाधिक ४ विकेट लिए।
भोजराज भट्टले ३ विकेट लिँदा शेर मल्लले २ र हेमन्त धामीले १ विकेट लिए। सुदूरपश्चिम प्रदेश भने ५ खेलमा १ जित र ४ हारसहित अंक तालिकाको पुछारमा रहेको छ।
facebook sharing buttonmessenger sharing buttontwitter sharing button
