: प्रधानमन्त्री कप पुरुष राष्ट्रिय प्रतियोगितामा विभागीय डर्बीको खेलमा त्रिभुवन आर्मी क्लबले एपीएफ क्लबलाई ३ विकेटले पराजित गरेको छ।
भैरहवास्थित एक्स्ट्राटेक ओभल क्रिकेट रंगशालामा भएको खेलमा एपीएफले दिएको १४२ रनको विजयी लक्ष्य पछ्याएको आर्मीले ७ विकेट गुमाउँदै ४२.५ ओभरमा १४५ रन बनाउँदै जित हासिल गरेको हो।
त्रिभुवन आर्मीका लागि आठौं विकेटका लागि सोमपाल कामी र कुशल मल्लले ५८ रनको साझेदारी गर्दै टिमलाई जित दिलाएका हुन्। आर्मीका लागि कुशल मल्लले सर्वाधिक ३१ रनको अविजित पारी खेले।
उनले ५९ बलमा ४ चौका र १ छक्का प्रहार गरेका हुन्। ओपनरद्वय तीर्थ राज दास र सन्तोष कार्की समान ३ रनमा पेभेलियन फर्किए। तेस्रो क्रमका इम्रान शेखले ११ रन बनाए।
वसिर अहमद १३ रन बनाउँदै क्याच हुँदा विवेक यादवले २६ रन बनाए। ८७ मा ७ विकेट गुमाएको आर्मीका लागि सोमपाल र कुशलको साझेदारी निकै महत्वपूर्ण रह्यो। सोमपाल कामी २२ रनमा अविजित रहे। उनले ५१ बलमा १ चौका प्रहार गरे। उनले ४२.५ ओभरमा टिमको जितका लागि १ रन चाहिएको अवस्थामा चौका प्रहार गर्दै जित दिलाएका हुन्।
एपीएफका लागि कमल सिंह ऐरी, अमर सिंह रौतेला र कप्तान रोहित पौडेलले समान २–२ विकेट लिए। किशोर महतोले १ विकेट लिए। त्यसअघि ब्याटिङ गरेको एपीएफ ४२.३ ओभरमा अलआउट हुँदै १४१ रन बनाएको थियो।
एपीएफका लागि सन्दीप जोराले सर्वाधिक ६५ रन बनाए। उनले ९१ बलमा ९ चौका प्रहार गरेका हुन्। शीर्ष क्रममा ४ ब्याटरले दोहोरो अंकमा रन बनाउन नसक्दा एपीएफको ब्याटिङ धरापमा परेको थियो। अमर सिंह रौतेला र भुवन कार्कीले समान ११–११ रन बनाए। किशोर महतो ११ रनमा वसिर अहमदबाट बोल्ड हुँदा अन्तिम ब्याटर अभिषेक गौतम शून्यमा अविजित रहे।
आर्मीका लागि आकाश चन्दले सर्वाधिक ४ विकेट लिए। उनले १० ओभरमा ३५ रन खर्चिए। सोमपाल कामीले ३ विकेट लिँदा साहब आलमले २ र वसिर अहमदले १ विकेट लिए।
एपीएफको यो दोस्रो हार हो। ५ खेलमा एपीएफले ३ जित र २ हार रहेको छ। नेपाल पुलिससँग हार बेहोरेको एपीएफले आज अर्को विभागीय डर्बीमा पनि पराजित भएको छ।
