: युवा फर्वाड सुवास बम ठकुरीलाई समेट्दै नेपालले मलेसिया र सिंगापुरसँग खेल्ने टिमको अन्तिम टोली घोषणा गरेको छ। प्रशिक्षक म्याट रोसले पहिलो पटक आफ्नो प्रशिक्षण अन्तर्गत २३ सदस्यीय नेपाली टोलीको घोषणा गरेका हुन्।
प्रारम्भिक चरणमा २८ खेलाडीलाई बन्द प्रशिक्षणमा राखेर खेलाडी छनोट गरिएको हो। गोलकिपर एन्जल श्रेष्ठ, डिफेन्डर सुमन श्रेष्ठ र फर्वाडमा सुवास बम ठकुरी रहेका छन्। सुवासले पहिलो पटक राष्ट्रिय टिममा प्रशिक्षणबाट अन्तिम टोलीमा स्थान बनाएका हुन्।
यसअघि अफगानिस्तान र ताजकिस्तानसँगको खेलमा टिम बाहिर रहेका अनन्त तामाङ र लकेन लिम्बुले पुन टिममा पुनरागमन गरेका छन्। कृतिस रत्न छुन्जु र रेजिन सुब्बा पनि टिममा फर्किएका छन्।
रोसले तीन नयाँ अनुहारलाई अन्तिम टोलीमा समावेश गरेका हुन्। जसमा नेपालले एएफसी एसियन कप छनोट २०२७ को तयारीस्वरूप सिंगापुरसँग मैत्रीपूर्ण फुटबल खेल्न लागेको हो। नेपालले मार्च २१ मा सिंगापुरसँग र मार्च २५ मा मलेसियासँग खेल्नेछ। पूर्व निर्धारित तालिकामा नेपालले छनोटको पहिलो खेल त्रिपुरेश्वरस्थित दशरथ रंगशालामा खेल्नुपर्ने थियो। मैदान र सुरक्षाका कारण देखाउँदै खेल स्थान मलेसिया सारिएको हो।
नेपालको अन्तिम टोलीः
गोलरक्षकः किरण चेम्जोङ, दिप कार्की, एन्जल श्रेष्ठ
डिफेन्डरः अनन्त तामाङ, विमल पाण्डे, सनिस श्रेष्ठ, रन्दिप पौडेल, सुमन श्रेष्ठ, सुमित श्रेष्ठ र अभिषेक लिम्बु
मिडफिल्डरः रोहित चन्द, लकेन लिम्बु, रोहन कार्की, मणि कुमार लामा, भरत खवास, एरिक विष्ट, मनिष डाँगी, कृतिश रत्न छुन्जु र आयुष घलान
फर्वाडः जिलेस्पी जंग कार्की, अञ्जन विष्ट, सुवास बम ठकुरी र रेजिन सुब्बा
