— सिद्धार्थ राजमार्गअन्तर्गत पाल्पाको तिनाउ गाउँपालिका–३, दोभान सिद्धबाबा क्षेत्रमा निर्माणाधीन सुरुङमार्गको भौतिक प्रगति ४५.५८ प्रतिशत पुगेको छ । आयोजना कार्यालयले मंगलबार जारी गरेको विज्ञप्तिअनुसार वित्तीय प्रगति ४३.०८ प्रतिशत रहेको छ ।
आयोजनाअन्तर्गत २ लेनको मुख्य सुरुङमार्ग १ हजार ८९ मिटर लम्बाइको निर्माण गरिएको आयोजना प्रमुख कृष्णराज अधिकारीले बताए । यसको मुख्य सुरुङमार्गको चौडाइ साढे १० मिटर र उचाइ करिब ७ मिटर रहनेछ । लाइनिङसहित यो सुरुङमार्गको कुल लम्बाइ १ हजार १२६ मिटर हुनेछ । यसमध्ये उत्तरतर्फ मुख्य सुरुङको इन्भर्टको काम २ सय ५० मिटर भइसकेको छ । दक्षिणतर्फ ३ सय २० मिटर काम गरी कुल ५७०.४ मिटर इन्भर्टको काम सकिएको आयोजना कार्यालयले जनाएको हो ।
मुख्य सुरुङमा लाइनिङको काम भने उत्तरतर्फ ९० मिटर र दक्षिणतर्फ १६० मिटर गरी २ सय ५० मिटर लाइनिङको काम सकिएको छ । यस्तै तीनवटै बाइपास ब्रेकथ्रु भए पनि यसको इन्भर्ट, लाइनिङको काम सुरु भएको छैन । स्लोप प्रोटेक्सनको दक्षिणतर्फ २ हजार ३०० मध्ये १४९५, उत्तरतर्फ ११०० मध्ये ४९५, एमआरवन माउन्टेन साइड ९६२० मध्ये ४८१, एमआरटु माउन्टेन साइट ७४४० मध्ये १४१४ स्क्वायर मिटर काम भएको आयोजनाले जनाएको छ ।
आयोजनाका अनुसार समयभित्र निर्माण व्यवसायीले काम गर्दा पनि सवारी गुडाउन अझै एक वर्ष अझै लाग्नेछ । सुरुङमार्गमा सवारी साधन गुडिरहेका बेला आपातकालीन अवस्थामा यात्रुलाई उद्धार गर्न १५१ मिटरको पहिलो बाइपास, १६१ मिटरको दोस्रो बाइपास र १३० मिटर दूरीको तेस्रो बाइपास पनि निर्माण गरिएको छ । बाहिरतर्फ अहिलेको सडक भत्काएर गर्नुपर्ने भएकाले यातायात मुख्य सुरुङबाट सञ्चालन गर्नुपर्ने प्रमुख अधिकारीले बताए ।
Sunrise bank
Nepal Life Insurance
लाइनिङ, भेन्टिलेसनको काम भने अझै बाँकी छ । भित्तामा कङ्क्रिटिङ गर्ने, वाटर प्रुफिङ, सडक निर्माण, सुरुङभित्र ढलान, भेन्टिलेसन, लाइनिङ, लाइटिङ, अक्सिजन, सुरक्षाका उपाय, आगो निभाउने यन्त्र जडानलगायतका काम गर्न बाँकी रहेको सूचना अधिकारी सविता ज्ञवालीले बताइन् । यसपछि सुरुङमार्गको उत्तर र दक्षिणपट्टी हेलिप्याडसमेत निर्माण गर्ने तयारी छ ।
यो आयोजना २०७८ फागुनमा ५ वर्षभित्र सम्पन्न गर्ने गरी ठेक्का सम्झौता भएको थियो । निर्माणको जिम्मा चिनियाँ कम्पनी चाइना स्टेट कन्स्ट्रक्सन इन्जिनियरिङ कर्पोरेसनले ७ अर्ब ३४ करोड २१ लाख रुपैयाँमा बनाउने ठेक्का सम्झौता गरेको छ । ठेक्का सर्तअनुसार पहिलो फेजमा निर्माण सुरु भएको ५ वर्षभित्र अर्थात् २०८३ चैत ८ गते निर्माण सम्पन्न गर्नुपर्ने हुन्छ ।
सुरुङमार्ग सम्पन्न हुँदा लुम्बिनी र गण्डकी प्रदेशका पाल्पा, रुपन्देही, गुल्मी, अर्घाखाँची, रुपन्देही, स्याङ्जा, पोखरा, बागलुङ, मुस्ताङ लगायतका क्षेत्रका बासिन्दाले सुरक्षित यात्रा गर्न पाउनेछन् ।
