: मकवानपुर बहुमुखी क्याम्पसमा अनेरास्ववियु र नेविसंघको प्यानल विजयी भएको छ। क्याम्पसको स्ववियु सभापतिमा अनेरास्ववियुका प्रसिद्ध रेग्मीले ७०६ मत ल्याएर निर्वाचित भए। योसँगै अनेरास्ववियुले ३ वर्षअघि गुमेको विरासत फिर्ता आयो।
उनका प्रतिद्वन्द्वी अखिल (क्रान्तिकारी)का छोइसाङ लामा ५०७ मत ल्याएर पराजित बन्न पुगे। उनै छोइसाङले ५ चैत २०७९ मा भएको स्ववियु निर्वाचनमा सभापति जित्दै अनेरास्ववियुको विरासत खोसेका थिए।
क्याम्पसको स्ववियु निर्वाचनको इतिहासमा पहिलोपटक अखिल क्रान्तिकारी विजयी बनेको थियो। त्यतिबेला क्रान्तिकारीले नेपाल विद्यार्थी संघ (नेविसंघ) र राष्ट्रिय प्रजातान्त्रिक विद्यार्थी संघ (राप्रविसंघ)सँग गठबन्धन गरेर चुनाव लडेको थियो।
स्ववियु निर्वाचनअन्तर्गत मकवानपुर क्याम्पसको स्ववियु सचिवमा रेग्मी नेतृत्वको प्यानलबाट नेविसंघका उत्सव ढुंगाना ७ सय ११ मत ल्याउँदै विजयी बने। कोषाध्यक्षमा अनेरास्ववियुका निर्दोष लुइँटेलले ७ सय ४ मत पाउँदै जित दर्ता गरे।
सदस्यमा मनोज घलान, उमेश चौधरी, दिवस चापागाईं, साजिर अन्सारी, कृषन थिङ, मन्दिप थापा, विवश अर्याल, अतित अधिकारी, रोहन गिरी, मिनेश पुडासैनी विजयी बने।
यस्तै अर्पण बल, पवित्रा विक, निर्मला गोले, प्रेमी घलान, कुशलराज भट्टराई र रामकृष्ण घोरासैनी निर्वाचित भएको निर्वाचन अधिकृत सन्देश बिडारीले बताए।
