। दिपेन्द्र रावतले अर्धशतकसँगै ३ विकेट पनि लिएपछि कर्णाली प्रदेशले प्रधानमन्त्री कप पुरुष राष्ट्रिय क्रिकेट प्रतियोगितामा लुम्बिनी प्रदेशमाथि रोमाञ्चक जित हासिल गरेको छ ।
तेस्रो जित निकाल्ने क्रममा कर्णालीले लुम्बिनीलाई ५ रनले हराएको हो । कर्णालीले दिएको २०६ रनको लक्ष्य पछ्याएको लुम्बिनी ३ बल अगावै २०० रनमा समेटियो ।
प्रज्वल थापाले अर्धशतक बनाएपनि पर्याप्त हुन सकेन । उनले ८४ रन बनाए भने कप्तान देव खनालले ४० रन बनाए । आकाश त्रिपाठीले २१ र मनिष थापाले १६ रन बनाए ।
कर्णालीका दिपेन्द्र रावतले १० ओभरमा ४१ रन दिएर ३ विकेट लिए । दिनेश अधिकारीले पनि ३ विकेट लिँदा प्रकाश जैसीले २ तथा दिवान पुन र सुनिल धमलाले १-१ विकेट हात पारे ।
त्यसअघि सिद्धार्थ क्रिकेट रंगशालामा भएको खेलमा टस जितेर पहिले ब्याटिङ गरेको कर्णालीले ४८.५ ओभरमा अलआउट हुँदै २०५ रन बनाएको थियो । कर्णालीका लागि दिपेन्द्रले सर्वाधिक ६६ रन बनाए भने अर्जुन घर्तीले ५६ रन बनाए ।
५६ रनमा ६ विकेट गुमेपछि दबाबमा आएको कर्णालीका लागि दिपेन्द्र र अर्जुन मिलेर १०२ रनको साझेदारी गर्दै कमब्याक गराएका थिए ।
लुम्बिनीका लागि रमेश कुर्मीले १० ओभरमा ३७ रन दिएर ३ विकेट लिए । निर्मल गुरुङ, अजय चौहान र बिप्राशन केसीले २-२ तथा कप्तान देव खनालले १ विकेट लिए ।
लुम्बिनीले ७ खेल खेल्दा ४ जित निकालेको छ भने कर्णालीले योसँगै ६ खेलमा ३ जित निकालेको छ ।
