: जापान सरकारले प्रदान गर्ने छात्रवृत्ति पाएका नेपाली विद्यार्थीहरूको बिदाइ गरिएको छ। नेपालस्थित जापानी राजदूत माएदा तोरुले शुक्रबार स्नातक, स्नातकोत्तर र विशेष तालिमका लागि छात्रवृत्ति पाएका नेपालीहरूको बिदाइ गरेका हुन्।
जापानको शिक्षा, संस्कृति, खेलकुद, विज्ञान र प्रविधि मन्त्रालयले उक्त छात्रवृत्ति ६ जना नेपालीलाई प्रदान गरेको छ। जापानले दुई देशबीचको कूटनीतिक सम्बन्ध स्थापना भएको एक वर्षपछि सन् १९५७ देखि नेपाली विद्यार्थीहरू छात्रवृत्ति प्रदान गर्दै आएको छ। जापानी दूतावासका अनुसार स्नातकोत्तरका लागि तीन, स्नातकका लागि दुई र विशेष तालिमका लागि एक जनालाई यस वर्षका लागि छात्रवृत्ति प्रदान गरिएको छ।
राजदूत माएदाले नेपाली विद्यार्थीहरूलाई ऐतिहासिक अवसरको सदुपयोग गर्न आग्रह गरेका थिए। उनले जापानी संस्कृतिका विभिन्न पक्षबारे ज्ञान प्राप्त गर्न र ऐतिहासिक अवसरलाई सदुपयोग गरेर पढाइमा ध्यान दिन आग्रह गरेका थिए। जापानबाट प्राप्त ज्ञान र अनुभवले नेपालको विकासमा योगदान पुर्याउन उनको आग्रह थियो। यसले नेपाल र जापान सम्बन्धलाई थप प्रगाढ बनाउने विश्वास पनि दिलाए।
