: इन्डियन प्रिमियर लिग (आइपीएल)को तेस्रो खेलमा चेन्नई सुपर किङ्सले मुम्बई इन्डियन्सलाई ४ विकेटले हराएको छ ।
चेन्नाईस्थित एमए चिदाम्बरम स्टेडियममा टस हारेर पहिले ब्याटिङ गरेको मुम्बईले १५५ रन बनाएको थियो ।
मुम्बईले दिएको १५६ को विजयी लक्ष्य पछ्याएको चेन्नई सुपर किङ्स (सिएसके)ले १९.१ ओभरमा ६ विकेट गुमाउँदै लक्ष्य पूरा गरेको हो ।
सिएसकेका लागि ओपनर ब्याटर रचिन रविन्द्रले सर्वाधिक ६५ रनमा अविजित रहे । उनले ४५ बलमा २ चौका र ४ छक्का प्रहार गरे । ६ बलमा ४ रन चाहिएको अवस्थामा रविन्द्रले अन्तिम ओभरको पहिलो बलमा मिचेल सेन्टनरलाई छक्का प्रहार गर्दै सिएसकेको जित पक्का गरेका हुन् ।
कप्तान ऋतुराज गायक्वाडले ५३ रनको अर्धशतकीय पारी खेले । ओपनर राहुल त्रिपाठी २ रनमा पेभेलियन फर्किए । शिवम दुबेले ९,दिपक होडाले ३ र साम करणले जम्मा ४ रन बनाए । रविन्द्र जडेजा १७ रनमा रनआउट भए । महेन्द्र सिंह धोनी शुन्यमा अविजित रहे ।
मुम्बईका लागि बलिङमा विग्नेश पुथुरले सर्वाधिक ३ विकेट लिए । विल ज्याक र दिपक चाहरले समान १-१ विकेट लिए ।
त्यसअघि ब्याटिङ गरेको मुम्बई इन्डियन्सले निर्धारित २० ओभरमा ९ विकेट गुमाउँदै १५५ रन बनाएको थियो ।
मुम्बईका लागि तिलक बर्माले सर्वाधिक ३१ रन बनाए । उनले २५ बलमा २ चौका र २ छक्का प्रहार गरेका हुन् ।
ओपनिङमा आएका रोहित शर्मा खलिल हमिदको बलमा डकआउट हुँदा मुम्बईलाई पहिलो ओभरमै झड्का लागेको हो । अर्का ओपनर र्यान रिकेल्टोनले १३ रन बनाए ।
कप्तान सूर्य कुमार यादवले २९, विल जयाक्सले १, नमान धिरले १७, मिचेल सेन्टनरले ११, लिपक चाहरले २८ रन बनाए ।
चेन्नाई सुपर किङ्स(सिएसके) का लागि बलिङ तर्फ नुर अहमदले सर्वाधिक ४ विकेट लिए । उनले ४ ओभर बलिङ गर्दै १८ रन मात्रै खर्चिए । खलिल हमिदले ३ विकेट लिँदा नथान इल्स् र रविचन्द्र आश्विनले समान १–१ विकेट लिए ।
आजको पहिलो खेलमा सन राइजर्स हैदरवादले राजस्थान रोयल्सलाई ४४ रनले हराएको थियो ।
