: प्रधानमन्त्री कप पुरुष राष्ट्रिय प्रतियोगितामा सुदूरपश्चिम प्रदेशले कोशी प्रदेशलाई ३१ रनले हराउँदै प्रतियोगितामा तेस्रो जित दर्ता गरेको छ।
लमहीस्थित देउखुरी क्रिकेट रंगशालमा टस जितेर ब्याटिङ गरेको सुदूरपश्चिमले २४२ रन बनाएको थियो। सुदूरपश्चिम प्रदेशले दिएको २४३ रनको लक्ष्य पछ्याएको कोशी प्रदेश ४५.१ ओभरमा २११ रन बनाउँदै अलआउट भयो।
कोशीका लागि ओपनर सकिब हकले ६२ रनको अर्धशतकीय पारी खेले। उनको अर्धशतकले पनि कोशीलाई जित भने दिलाउन सकेन। हकले ६६ बलमा ११ चौकासहित ६२ रन बनाएका हुन्। अर्का ओपनर सोनु अन्सारी डक आउट भए। ऐस भट्टराईले ३६, कप्तान अंकित सुवेदी र समिर कार्कीले समान ३८–३८ रन बनाए। दिपेश कँडेलले १४ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्।
सुदूरपश्चिमका लागि बलिङतर्फ सूर्य श्रेष्ठले सर्वाधिक ३ विकेट लिए। उनले ९ ओभरमा १ मेडनसहित ४५ रन खर्चिए। भोजराज भट्टले २ विकेट लिँदा, शेर मल्ल, नारायण जोशी र राहुल भण्डारीले समान १–१ विकेट लिए। त्यसअघि ब्याटिङ गरेको ४३.४ ओभरमा २४२ रन बनाउँदै अलआउट भएको हो।
सुदूरका मध्य क्रमका ब्याटर किरण ठगुन्नाले ११५ रनको शतकीय पारी खेल्दै टिमलाई ठूलो योगफल दिलाए। उनले ९१ बलमा १२ चौका र २ छक्का प्रहार गरेका हुन्। यही संस्करणको प्रधानमन्त्री कपमा उनको यो दोस्रो शतक हो। उनले यसअघि गण्डकी प्रदेशसँग १२१ रनको अविजित शतकीय पारी खेलेका थिए।
ओपनर ब्याटर टेक रावतले १६ रन बनाए। निश्चल क्षेत्रीले १०, अर्जुन विकले १५, कप्तान नारायण जोशी र शेर मल्लले समान १४–१४ रन बनाए। सूर्य श्रेष्ठ १० रनमा अविजित रहे। कोशीका लागि ज्ञानेन्द्र श्रेष्ठले सर्वाधिक ४ विकेट लिए। उनले ९.४ ओभरमा १ मेडनसहित ४८ रन खर्चिए। फिर्दोस अन्सारी र अंकित सुवेदीले समान २–२ विकेट लिए। दिपेश कँडेल र प्रकाश कार्कीले १–१ विकेट लिए। कोशीले हालसम्म ८ खेलमा १ मात्र जित निकालेको छ।
