: प्रधानमन्त्री कप पुरुष राष्ट्रिय प्रतियोगितामा लुम्बिनी प्रदेशलाई ७ विकेटले हराउँदै एपीएफले फाइनल यात्रा कायमै राखेको छ। भैरहवास्थित एक्स्ट्राटेक ओभलमा टस जितेर ब्याटिङ गरेको लुम्बिनीले २२३ रन बनाएको थियो।
लुम्बिनीले दिएको २२४ रनको लक्ष्य पछ्याएको एपीएफले ४१.५ ओभरमा ३ विकेट गुमाउँदै लक्ष्य पूरा गरेको हो। एपीएफका लागि पुरन विकले सर्वाधिक ७२ रनको अविजित पारी खेले। कप्तान रोहित पौडेलले ७१ रन बनाए। ओपनरद्वय लोकेश बम र आसिफ शेखले क्रमशः २१ र १८ रन बनाए। सन्दीप जोराले २१ रनको अविजित पारी खेले।
लुम्बिनीका एक बलरले मात्र विकेट लिए। राजेन्द्र बमले एपीएफको ३ विकेट लिए। त्यसअघि पहिलो इनिङ्समा ब्याटिङ गरेको लुम्बिनीले निर्धारित ५० ओभरमा ८ विकेट गुमाउँदै २२३ रन बनाएको थियो। लुम्बिनीका लागि कप्तान देव खनालले सर्वाधिक ६३ रनको अर्धशतकीय पारी खेले। उनले ७९ बलमा ४ चौका प्रहार गरे।
ओपनर ब्याटर मिर्नाल गुरुङले ५५ रनको अर्धशतकीय पारी खेले। अर्का ओपनर सम्राट भुसाल ३ रनमै पेभेलियन फर्किए। आकाश त्रिपाठीले २२ र प्रज्वल थापाले २० रन बनाए। निर्मल गुरुङ २० रनमा अविजित रहे। अमर सिंह रौतेला र अभिषेक गौतमले समान ३-३ विकेट लिए। मौसम ढकालले २ विकेट लिए।
