। अर्जेन्टिनी स्टार लियोनेल मेस्सीले बेन्चबाट आएर उत्कृष्ट गोल गरेपछि मेजर लिग सकर (एमएलएस)मा इन्टर मियामीले जित हासिल गरेको छ ।
आइतबार विहान भएको खेलमा मियामीले फिलाडेल्फिया युनियनलाई २-१ गोलअन्तरले हराएको हो । वैकल्पिक खेलाडीको रूपमा दोस्रो हाफमा मैदान प्रवेश गरेका मेस्सीले मैदान प्रवेश गरेको दुई मिनेटमै शानदार गोल गरेका थिए ।
खेलको सुरुवातमै मियामीले अग्रता लिएको थियो । जोर्डी आल्बाको क्रसलाई बेन्जामिन क्रेमास्चीले पास दिए र रोबर्ट टेलरले उत्कृष्ट फिनिस गर्दै गोल गरे।
५५औं मिनेटमा मेस्सी मैदानमा छिरेपछि मियामी अझै बलियो बन्यो । लुइस सुवारेजको पास पाएका मेस्सीले उत्कृष्ट ड्रिब्लिङ गर्दै गोल गरेका थिए।
८०औं मिनेटमा ड्यानियल गाजडागले फिलाडेल्फियाका लागि एक गोल फर्काएपनि मियामीले जित भने जोगायो ।
यस जितसँगै इन्टर मियामी एमएलएसको शीर्ष स्थानमा उक्लिएको छ। अब टोलीले मंगलबार कन्काकाफ च्याम्पियन्स कपमा एलएएफसीसँग प्रतिस्पर्धा गर्नेछ।
