— प्यालेस्टिनी समूह हमासले मध्यस्थकर्ता इजिप्ट र कतारले अघि सारेको गाजा युद्धविराम प्रस्ताव स्वीकार गरेको छ । प्रस्तावमा ५० दिनको युद्धविरामको बदलामा इजरायललाई थप पाँच बन्धक रिहा गर्ने उल्लेख छ । हमास नेता खलील अल-हय्याहले इजिप्ट र कतारका मध्यस्थकर्ताले पठाएको मस्यौदा सम्झौतालाई अनुमोदन गरेको जनाएका हुन् ।
इजरायलले गाजा क्षेत्रमा पुनः लडाइँ सुरू गरेपछि इजिप्टले युद्धविराम जारी राख्नका लागि नयाँ प्रस्ताव ल्याएको हो । तर इजरायलले भने अर्को प्रस्ताव अघि सारेको छ । इजरायली प्रधानमन्त्री बेन्जामिन नेतान्याहुको कार्यालयले अमेरिकासँगको पूर्ण समन्वयमा मध्यस्थकर्तालाई अर्को प्रस्ताव पेस गरेको जनाएको छ ।
इजरायलले उक्त प्रस्तावमा अमेरिका सहमत भएको जनाए पनि थप विवरण दिएको छैन । यसबारे अमेरिकाले पनि सार्वजनिक रूपमा कुनै टिप्पणी गरेको छैन । प्रस्तावमा सहमति जुटेको खण्डमा नयाँ युद्धविराम सम्झौता आइतबारदेखि सुरू मुस्लिमहरूको पर्व ईद अल-फित्रसँगै सुरू हुने अपेक्षा गरिएको छ । नेतान्याहुको कार्यालयले मध्यस्थकर्ताको युद्धविराम प्रस्तावमा परामर्श गरेको बताएको छ ।
हमास र इजरायलबीच गत १९ जनवरीमा लागू भएको युद्धविराम यसै महिनाको सुरूमा समाप्त भएको थियो । त्यसयता इजरायली सेना (आईडीएफ) ले रफाहमा स्थलगत कारबाही सुरू गरेको थियो । आईडीएफले पछिल्लो समय गाजापट्टीमा हवाई आक्रमण जारी राखेको छ ।
पहिलो चरणको युद्धविरामको अवधिमा हमासले ३३ जना बन्धक मुक्त गरेको छ । त्यसको बदलामा इजरायली जेलमा रहेका करिब १९ सय प्यालेस्टिनी रिहा भएका छन् । इरान-समर्थित समूह हमासको नियन्त्रणमा अझै पनि ५९ जना बन्धक छन् । तर तीमध्ये २४ जना मात्र जीवित रहेका इजरायली प्रधानमन्त्रीको कार्यालयले जनाएको छ ।
