: युथ ओडीआई सिरिजको पहिलो खेलमा नेपाल अफगानिस्तान यू–१९ सँग पराजित भएको छ। अफगानिस्तानले नेपालमाथि १३० रनको फराकिलो जित दर्ता गरेको हो। मुलपानी क्रिकेट रंगशालामा टस जितेर ब्याटिङ गरेको अफगानस्तानले ३०० रन बनायो।
अफगानिस्तानले दिएको ३०१ को बलियो लक्ष्य पछ्याएको नेपाल ४६.२ ओभरमा १७० रन बनाउँदै अलआउट भयो। नेपालका लागि निरज कुमार यादवले सर्वाधिक ५३ रन बनाए।
सन्तोष यादव र अशोक धामीले समान २४–२४ रन बनाए। अभिषेक तिवारीले १७ रन, कप्तान नरेन भट्टले १३ र सिब्रीन श्रेष्ठले ११ रन बनाउँदा अन्य कुनै पनि ब्याटरले दोहोरो अंकमा रन बनाउन सकेनन्।
अफगानिस्तानका लागि बलिङमा जैतुल्लाह साहिन, वाहिदुल्ला जद्रन र महबुब खानले २–२ विकेट लिए। अब्दुल एज, नोरिसतानी ओमराजाइ र नाजिफुल्लाह अमिरीले समान १–१ विकेट लिए।
त्यसअघि ब्याटिङ गरेको अफगानिस्तानले निर्धारित ५० ओभरमा ९ विकेट गुमाउँदै ३०० रन बनाएको थियो। अफगानिस्तानका लागि फेसल सिनोजादाईले सर्वाधिक ९७ रन बनाए। ओपनर खालिद अहमदजाईले ७६ रन बनाए। खलिद र सिनोजादाईले दोस्रो विकेटका लागि १५४ रनको साझेदारी गरे। बर्कात इब्राहिमजाईले ३५ रन तथा आजीजुल्ला मिया खिलले २१ रनको पारी खेले। अब्दुल अजिज १५ र वाहिदुल्लाह जाद्रन २ रनमा अविजित रहे।
नेपालका लागि बलिङमा सन्तोष यादवले सर्वाधिक ३ विकेट लिए। अभिषेक तिवारीले २ विकेट लिँदा दयानन्द मण्डल र बिपिन प्रसाद शर्माले १–१ विकेट लिए। ३ खेल सम्मेलित युथ ओडीआईको दोस्रो खेल चैत्र २४ गते हुनेछ भने अन्तिम खेल चैत्र २७ गते हुनेछ।
