: सनराइजर्स हैदराबादलाई हराउँदै कोलकाता नाइट राइडर्सले इन्डियन प्रिमियर लिग (आइपीएल)मा दोस्रो जित दर्ता गरेको छ। कोलकाताले घरेलु मैदान इडेन गार्डेनमा टस हारेर ब्याटिङको निम्तो पाएको थियो। टस हारेर ब्याटिङ गरेको कोलकाताले २०० रन जोडेको थियो।
कोलकाताले दिएको २०१ रनको लक्ष्य पछाएको हैदराबाद १६.४ ओभरमा १२० रनमा अल आउट भएको हो। हैदराबादका लागि हेनरिच कालसेनले सर्वाधिक ३३ रनको पारी खेले उनले २१ बलमा २ चौका र २ छक्का प्रहार गरे।
ओपनरमा आएका ट्राभिस हेड र अभिषेक शर्मा दोहोरो अंक नबनाई पेभेलियन फर्किए। तेस्रो क्रममा आएका इशान किसानले पनि २ रनभन्दा जोड्न सकेनन्। पहिलो खेलमा शतक बनाएका इशान त्यसपछिको खेलमा भने चल्न सकेका छैनन्।
नितेश कुमार रेड्डीले १९, कामेन्दु मान्डेसले २७ रन बनाउँदा, कप्तान प्याट कमिन्सले १४ रन बनाए। अन्य कुनै पनि ब्याटरको ब्याटबाट दोहोरो अंकको रन बनेन।
हैदराबादलाई सस्तैमा समेट्न कोलकाताका बलर वैभव अरोरा र वरुण चक्रवर्तीले समान ३-३ विकेट लिए। आन्द्रे रसेलले २ विकेट लिँदा हर्षित राणा र सुनिल नारायणले १-१ विकेट लिए। त्यसअघि, पहिलो इनिङ्समा ब्याटिङ गरेको कोलकाताले निर्धारित २० ओभरमा ६ विकेट गुमाउँदै २०० रन बनाएको थियो।
कोलकाताको लागि बैंकटेश अय्यरले सर्वाधिक ६० रनको अर्धशतकीय पारी खेले। उनले २९ बलमा सात चौका र तीन छक्का प्रहार गरे। कोलकाताका ओपनरद्वय क्विन्टन डिकक र सुनिल नारायणले दोहोरो अंकमा रन बनाउन सकेनन्। तेस्रो क्रममा आएका कप्तान अजिन्क्य रहनेले ३८ रन बनाए । अङ्गकृत रघुवंशीले ५० रनको अर्धशतकीय पारी खेले। रिंकु सिंह ३२ रनमा अविजित रहे।
हैदराबादका लागि बलिङमा मोहम्मद सामी, कप्तान प्याट कमिन्स, जिसन अन्सारी, हर्सल पटेल र कामिन्डु मान्डिसले समान १-१ विकेट लिए।
अंक तालिकामा हेर्ने हो भने, कोलकता नाइट राइडर्स दोस्रो जितसहित चार अंक बटुल्दै पाँचौं स्थानमा उक्लिएको छ। कोलकाताले चौथो खेल खेल्दा दुई खेलमा हार र दुई खेलमा जित दर्ता गरेको छ। समान ४ खेल खेलेको हैदराबादले जम्मा एक खेलमा मात्रै जित निकालेको छ। हाल हैदराबाद २ अंकसहित अंक तालिकाको पुछारमा रहेको छ।
शुक्रबार आइपीएलमा लखनउ सुपर जायन्स र मुम्बई इन्डियन्सले खेल्नेछन्।
